Европската централна банка (ЕЦБ) остана на зборот и го спроведе планираното зголемување на каматните стапки за половина поен, но функционерите се необично тивки за она што ќе следува во услови на банкарска бура што го загрози опстанокот на „Кредит Суис“ (Credit Suisse Group AG).
Депозитната стапка денеска е подигната на 3 отсто, како што официјалните лица означија уште на нивниот последен состанок пред шест недели и како што очекуваа мнозинството економисти, но изостана каква било изјава или индикации што би укажале на идните потези во однос на каматните стапки.
Откако економијата се соочи со превирањата предизвикани од колапсот на банката „Силикон валеј“ (СВБ) и тонењето на акциите на „Кредит Суис“, Управниот одбор на ЕЦБ се собра на својот дводневен состанок, отворајќи загриженост за здравјето на поширокиот банкарски сектор.
И покрај предупредувањето дека инфлацијата ќе остане „премногу висока премногу долго“, претставниците на ЕЦБ одбија да дадат насоки како ќе постапат кога следниот пат ќе ги одредуваат трошоците за задолжување - во мај. Со ова ја прекинаа практиката од неодамнешните состаноци, токму во моменти на зголемени стравови за финансиската стабилност.
„Зголеменото ниво на несигурност ја зајакнува важноста на пристапот базиран на податоци кон одлуките на Управниот одбор кога станува збор за каматните стапки“, се вели во соопштението на ЕЦБ. Централната банка „внимателно ги следи тековните превирања на пазарот и е подготвена да одговори доколку е потребно за да се зачуваат стабилноста на цените и финансиската стабилност“.
Кварталните економски проекции што ја придружуваа објавата покажуваат забавување на инфлацијата повеќе отколку што се очекуваше за годинава, но со посилна и поупорна базична мерка, која ги исклучува нестабилните цени како оние на храната и енергијата.
ЕЦБ ги намали прогнозите за вкупната инфлација, но ја зголеми процената за базичната во 2023 година
Bloomberg
Стабилизацијата во „Кредит Суис“ ќе биде поздравена од ЕЦБ, која е категорична дека нејзината битка со инфлацијата останува далеку од завршена. Прашањето сега е дали неодамнешните банкарски проблеми ја ограничуваат нејзината способност да се справи со зголемувањето на цените, кое иако е умерено, остануваа поблиску до двоцифрена вредност отколку до посакуваната цел од 2 отсто.
Потпретседателот на ЕЦБ, Луис де Гвиндос, во вторникот им порачал на министрите за финансии од Европската Унија дека комерцијалните банки би можеле да бидат ранливи на зголемените стапки, но нагласил и дека кредиторите во регионот се многу помалку изложени на превирања за разлика од американските заемодавци, според луѓе запознаени со разговорите.
Пазарите сега сметаат дека ЕЦБ ќе прави помалку. Тие ги поместија облозите за врвот во циклусот на зголемување на стапката на 3,2 отсто од 4,2 отсто пред една недела.
Претседателката Кристин Лагард ќе одржи прес-конференција во 14.45 часот во Франкфурт, за да ја елаборира одлуката на ЕЦБ.
.webp){kind=icon}
