Францускиот претседател Емануел Макрон ги претстави мерките за поттикнување пресврт на индустрискиот пад на земјата, додека се обидува да одговори на огромната американска помош за своите зелени сектори и со тоа да го обнови своето политичко богатство дома.
Ветувањата вклучуваат проширувања на даночните олеснувања за инвестиции, поедноставување на процедурите за отворање нови фабрики и зајакнување на финансирањето во образование и обука. Тој рече и дека владата ќе ги промени бонусите за електричните возила, за да ги исклучи произведените со голем јаглероден отпечаток, мерка што ќе го поддржи европското производство.
„Битката за реиндустријализација е клучна на економско и геополитичко ниво и е клучна на политичко ниво за единството на нацијата. Мора да забрзаме и да одиме многу подалеку“, им рече Макрон на бизнис-лидерите и пратениците што беа собрани денеска во Елисејската палата во Париз.
Францускиот лидер се обидува да го обнови своето претседателствување по за него политички штетната борба околу промените во пензискиот систем, кои предизвикаа огромното противење во јавноста и отворија прашања дали може да продолжи да ги турка реформите.
Иницијативите имаат за цел да се справат со долгогодишната индустриска слабост на Франција, поради која таа тоне уште повеќе зад конкурентите од Европската Унија (ЕУ). Уделот на производството во втората по големина економија во ЕУ се намали на 10 проценти, што е далеку помалку во споредба со уделот на Германија од над 20 отсто.
Bloomberg Mercury
Владата е загрижена дека американскиот закон за намалување на инфлацијата може да ги влоши веќе постојните тешкотии со привлекување инвестиции од Европа поради ветените поголеми субвенции.
„Реиндустријализацијата на Франција и Европа е клучно прашање на суверенитетот. Ако не го направиме тоа, ќе зависиме од другите“, рече Макрон.
Мерките на Макрон опфаќаат:
- Намалување на времето потребно за создавање нова фабрика од 17-18 месеци на само девет месеци, со паралелно водење на процесите на одобрување.
- Користење нови одредби на ЕУ што би можеле да дозволат даночни олеснувања меѓу 25 и 40 проценти за капиталните трошоци за производство на турбини на ветер, батерии, топлински пумпи и соларни панели.
- Инвестиции од 700 милиони евра за обука на повеќе луѓе за зелена индустрија.
- Да се преработат правилата за бонуси за купување електрични автомобили за да се исклучат тие што се произведени со високи емисии на јаглерод и да се зголемат екобарањата во јавните тендери.
- Да се инвестира една милијарда евра за чистење на старите индустриски локации за да бидат подготвени за нови проекти.
- Да се инвестираат 100 милиони евра оваа година во индустриски локации во повеќе региони низ Франција.
Некои од мерките ќе бидат претставени во таканаречениот предлог-закон за зелена индустрија уште следната недела, додека други, кои влијаат на јавните финансии, ќе бидат вклучени во нацрт-законот за буџетот за 2024 година. Од Министерството за финансии рекоа дека нето-трошокот за промените мора да биде нула, при што секое ново трошење, како што се даночните олеснувања, ќе се избалансира со кратења на друго место.
Измените за субвенциите за автомобили во корист на возилата со низок јаглероден отпечаток се очекува да бидат финализирани во наредните месеци.
„Ќе бидеме првата земја во Европа што ќе ги реформира критериумите за доделување бонуси на возилата за повеќе да се земе предвид јаглеродниот отпечаток од производството на возилата. Ќе ги поддржиме батериите и возилата произведени во Европа, бидејќи нивниот јаглероден отпечаток е добар“, рече Макрон.
.webp){kind=icon}
Во моментов нема коментари за веста. Биди прв да коментира...