.webp){kind=icon}
Прекините со работа поради штрајковите на главниот аеродром во Париз ќе станат се почести во текот на викендот, а француската цивилна авијација веќе нареди да се откажат повеќе летови денеска. Надлежните им соопштија на авиокомпаниите да укинат 20 отсто од летовите помеѓу 7 часот наутро и 14 часот по полноќ, на аеродромот Шарл де Гол, што е повеќе од летовите кои беа откажани вчера во тој период. Синдикатите продолжија со штрајкот откако не постигнаа договор за платите со операторот Aeroports de Paris.
Штрајковите и откажувањата го претворија Париз во најнова точка во која се гушат европските туристички мрежи оваа пролет и лето, а претходно слична беше ситуацијата и во Лондон, Амстердам и Франкфурт каде беа откажани илјадници летови поради недостиг на работна сила и спорови околу платите.
Авиокомпаниите ги намалија своите распореди и ги зголемија цените за оние кои сè уште можат да обезбедат билети. Дојче Луфтханза АГ во петокот соопшти дека ќе понуди седишта само во најскапата класа за резервации за месец јули. Тоа ќе ја зголеми цената дури и на најевтините повратни летови меѓу Лондон и Франкфурт на 1.000 евра (1.037 долари).
Работниците на Ryanair Holdings Plc во Шпанија требаше да излезат на штрајк веќе втор викенд, додека персоналот во базите EasyJet Plc таму го започна првиот од серијата тридневни штрајкови во петокот.
Ер Франс, најголемиот авиопревозник на Шарл де Гол, ќе откаже 90 летови денеска, потврди портпаролот. Превозникот, дел од Air France-KLM, планира да ги одржува сите летови на долги релации и речиси 90 отсто од летовите на кратки и средни дестинации.
Две од четирите писти на центарот ќе бидат затворени поради работниците кои штрајкуваат, вклучително и пожарникарите. Ер Франс соопшти дека дополнително ќе го прилагоди својот распоред во зависност од информациите од аеродромот и воздухопловната управа.
„Не може да се исклучат одложувања и откажувања и во последен момент“, се вели во соопштението на Ер Франс, истакнувајќи дека работничките немири би можеле да траат до недела.
Разговорите со лидерите на синдикатот не резултираа со договор, но Aeroports de Paris го одржува дијалогот отворен, се вели во соопштението на операторот.
