.webp){kind=icon}
Падот на активноста на приватниот сектор во еврозоната забрза во август. Услугите престанаа да бидат светла точка и се приклучија на индустрискиот сектор, кој исто така забележа пад.
Флеш проценката на ПМИ (PMI) падна на 47, уште повеќе под прагот од 50 поени што ја означува границата помеѓу растечката и опаѓачката активност. Ваков негативен резултат не очекуваше ниту еден економист анкетиран од „Блумберг“. Услужниот сектор го забележа првиот пад од крајот на 2022 година, а за овој сектор се очекуваше континуиран раст на активноста.
Композитни (бела линија), производствени (сина линија) и услужни (виолетова линија) ПМИ индекси во еврозоната
Bloomberg
Податоците се особено лоши во Германија, каде што вкупната економска активност падна со најбрзо темпо од првиот бран на пандемијата што ја фрли економијата на колена во мај 2020 година. Франција објави трет месечен пад на производството, додека остатокот од еврозоната забележа помал пад.
„Услужниот сектор во еврозоната за жал покажува знаци на пад и изедначување со производствениот сектор“, рече Сајрус де ла Рубија, главен економист во Hamburg Commercial Bank. „Услужните компании забележаа намалување на активноста за првпат од крајот на минатата година, додека производството повторно опадна“, додава тој.
„Бројките покажуваат дека економијата на еврозоната ќе се намали за 0,2 отсто во третиот квартал, наспроти растот од 0,3 отсто во вториот квартал“, заклучува економистот.
Извештајот доаѓа во клучен момент кога Европската централна банка (ЕЦБ) треба да одлучи дали ќе направи пауза во септември или ќе продолжи да ги зголемува каматните стапки. Додека падот на економската активност би одел во прилог на пауза, овој извештај исто така предупредува на растот на цените кој останува постојан.
