Вработените во анкета изразија незадоволство од претседателката на ЕЦБ

Вработените во Европската централна банка (ЕЦБ) во синдикална анкета главно негативно ја оценија работата на претседателката Кристин Лагард, која е на половина пат од својот осумгодишен мандат.

Во декемвриската анкета спроведена од синдикатот на вработените во ЕЦБ, ИПСО, нешто повеќе од половина од испитаниците го оцениле нејзиното управување со ЕЦБ како слабо или многу слабо. Дури 53 отсто се изјасниле и дека Лагард не е вистинската личност за местото челник на ЕЦБ.

Резултатот од истражувањето е значително полош отколку што беше за претходниците на Лагард, Марио Драги и Жан-Клод Трише. Тие во анкетите на крајот од својот мандат добија главно позитивни оцени.

„Истражувањето открива широкораспространето незадоволство меѓу испитаниците по внатрешните прашања, вклучувајќи ја и политиката за различности“, се наведува во документот на ИПСО, во кој „Блумберг“ имал увид. Многумина ја критикуваат Лагард затоа што таа „троши премногу време на прашања што не се поврзани со монетарната политика и премногу често влегува во политичката сфера“.

Во истражувањето се изразени мислењата на 1.159 луѓе, што е помалку од една четвртина од над 5.000 вработени и специјализанти што работат во ЕЦБ. ЕЦБ го оцени истражувањето како проблематично.

„Тоа вклучува прашања за кои е одговорен Извршниот одбор или Советот на ЕЦБ, а не само претседателката, и кои не се во надлежност на ИПСО. ЕЦБ добива информации од вработените преку редовни анкети спроведени во согласност со професионалните стандарди и ќе продолжи да го прави тоа“, изјави портпаролот на ЕЦБ.

Покрај тоа, портпаролот забележува дека ИПСО е направен така што истото лице може да ја пополни анкетата повеќе од еднаш. ИПСО признава дека е можно тоа, но верува во исправноста на резултатите.

Според портпаролот, анкетите меѓу вработените обично даваат околу 3.000 одговори, а последната одржана минатата година покажала дека 80 отсто од вработените се задоволни и горди на работата во ЕЦБ.

Односот меѓу раководството на ЕЦБ и вработените веќе е тестиран од инфлацијата и поплаките од претставници на синдикатите за недоволно зголемување на платите.

Годинава платите треба да пораснат за 4,7 отсто, по нешто повеќе од четири отсто лани.

Во документот на ИПСО се наведува дека меѓу вработените има мислења оти стилот на управување на ЕЦБ е „автократски и дека претседателката се обидува да промовира лични интереси додека ги подготвува следните чекори“.

Но има и такви што дадоа позитивна оцена за Лагард, велејќи дека таа „ги инспирира како лидер и дека се горди што работат со неа“.

Во моментов нема коментари за веста. Биди прв да коментира...

Остави коментар