Инфлацијата во еврозоната забави помалку од очекуваното, нова дилема за кратењата на ЕЦБ

Инфлацијата во еврозоната се намали помалку од очекуваното на почетокот на годината - тестирајќи ги очекувањата на инвеститорите дека Европската централна банка (EЦБ) ќе започне со намалување на каматните стапки веќе напролет.

По растот во декември, поттикнат од базичните ефекти, потрошувачките цени во јануари се зголемија за 2,8 отсто од годината претходно, објави во четвртокот „Евростат“. Тоа е над просечната процена од 2,7 отсто во анкетата на „Блумберг“ спроведена меѓу економистите. Базичната инфлација, која ги изостава нестабилните ставки како што се храната и енергијата, исто така се намали помалку од предвиденото, на 3,3 отсто.

По невидениот налет на зголемувања на стапките помеѓу јули 2022 и септември 2023 година, ЕЦБ ја отвори вратата за олабавување на монетарната политика годинава. Официјалните лица, сепак, се претпазливи да дадат јасни насоки за периодот пред да бидат сигурни дека растот на цените е цврсто на пат да се врати до целта од два отсто.

Претседателката Кристин Лагард минатата недела рече дека Управниот совет сака да навлезе „понатаму во процесот на дезинфлација за да биде доволно сигурен“. Неделава таа сигнализираше дека потег пред состанокот во јуни е малку веројатен, опишувајќи ги како „критично важни“ очекуваните податоци за платите што достасуваат непосредно пред тоа.

Во САД, Федералните резерви (Фед) исто така се обидоа да ги ублажат очекувањата за олеснување, при што претседателот Џером Пауел во средата истури ладна вода врз очекувањата за намалување во март.

Bloomberg

Некои од колегите на Лагард се склони да бидат трпеливи како неа, но други се залагаат за побрзи кратења - аргументирајќи го тоа со слабата економија на еврозоната, за која податоците неделава покажаа дека повторно за малку избегна рецесија.

Гувернерот на Банката на Франција, Франсоа Вилерој де Галхау, изјави дека трошоците за позајмување ќе се намалат годинава и „сè ќе биде отворено на нашите следни состаноци“. Пазарите на пари го заокружија април како најверојатна почетна точка за намалување и сметаат дека ќе има поместување од вкупно 150 базични поени во текот на 2024 година.

ЕЦБ предвидува поголема дезинфлација годинава, но со многу побавно темпо отколку во 2023 година, кога ценовните добивки паднаа на дури 2,4 отсто во ноември. Банката и натаму очекува да ја постигне својата цел во 2025 година.

Проекциите на економистите се разликуваат во голема мера - нагласувајќи ја неизвесноста од геополитичките тензии преку оружените конфликти и изборите во голем дел од светот. Тие сметаат дека стапките ќе се намалат подоцна од очекувањата на пазарите, односно во јуни.

Сликата за инфлацијата е исто така различна меѓу најголемите членки на еврозоната, при што минатиот месец залади во Германија и Франција, но забрза во Италија и Шпанија.

Во моментов нема коментари за веста. Биди прв да коментира...

Остави коментар