Кои се најдобрите електрични автомобили: Тест на германски АДАК

„Шкода енијак“ (Škoda Enyaq), „порше тајкан“ (Porsche Taycan), „фолксваген ИД7 про“ (VW ID.7 Pro), и „хјундаи кона електро“ (Hyundai Kona Elektro) беа прогласени за победници во своите класи по тестирањето што го спроведе германскиот автомобилски клуб АДАК (ADAC) на повеќе од педесетина електрични автомобили. Тестот на АДАК се базира на оценување на перформансите на возилата наспроти трошокот за набавка односно каква вредност добиваат купувачите за потрошените пари. 

Од АДАК нагласуваат дека за првпат автомобил доби оценка 1,5 (многу добар), и тоа не е ниту „порше“ со висока цена ниту „мерцедес“ или БМВ. Станува збор за „фолксваген ИД7 про“, големиот електричен седан од Волфсбург.

„Трката за првите места е неверојатно возбудлива. Во секој случај, одлуката за купување вообичаено се базира на односот цена-перформанси“, наведуваат од АДАК.

Оттаму додаваат дека различни модели постигнуваат добри резултати и дека има причина зошто „тесла ипсилон“ (Tesla Model Y), „фолксваген ИД4/ИД5“, „мерцедес ЕКјуА“ (Mercedes EQA), па дури и „фиат 500е“ (Fiat 500e) се на врвот на листите на новорегистрирани возила.

„Бидејќи владините стимулации за продажба се елиминирани, брендовите се натпреваруваат со попусти или особено атрактивни услови за лизинг. Во овој поглед експертите очекуваат дека особено кинеските производители на автомобили заедно со ’Тесла’ јасно ќе се истакнат во иднина“, сметаат од АДАК.

Од автоклубот посочуваат дека електричните возила произведени во Кина сега постигнуваат повеќе од респектабилни оценки на нивните тестови, иако сè уште ги нема на врвот на ранг-листите. Од АДАК ја издвојуваат „Нио“ (Nio) со висококвалитетните модели ET5, ET7, EЛ6 и EЛ7 или „експенг Г9“ (Xpeng G9).

„Помеѓу Кинезите, МГ особено нуди добар сооднос цена-перформанси, но БЈД и ’Смарт’ исто така ќе бидат вклучени порано или подоцна. Битката за врвни позиции и удел на пазарот ќе продолжи да се интензивира“, најавуваат од АДАК.

Во моментов нема коментари за веста. Биди прв да коментира...

Остави коментар