Енергетската криза може да има поголеми последици од кризата во 2008

Повеќе од половина од домаќинствата во Обединетото Кралство (ОК) се во ризик да бидат турнати во енергетска сиромаштија оваа зима поради зголемените сметки и зголемените долгови, што едноставно не може да се отплатат.

Според консултантската компанија Баринга Партнерс (Baringa Partners), актуелната енергетска криза може да има поголемо влијание врз домаќинствата отколку финансиската криза од 2008 година. Ваквото мрачно предвидување доаѓа поради проекциите дека сметките за струја ќе се зголемат за околу 80 отсто од октомври кога со доаѓањето на студеното време ќе се зголеми и побарувачката за енергија.

Сметките за енергија во текот на зимскиот период се очекува да бидат дури тројно повисоки споредено со минатата зима. Тоа дополнително ќе ги скастри буџетите на потрошувачите, кои што и без тоа се значајно погодени од зголемените трошоци за живот. Сето тоа ги зголемува стравовите од рецесија и поттикнува повици до владата да понуди поголема помош.

„Влијанието врз општеството ќе биде поголемо од влијанието на кризата во 2008 година“, вели Џејмс Купер, партнер во Баринга. „Ние сега се движиме во насока каде поголемиот дел од домаќинствата се во долгови или се во многу кревка финансиска состојба“, објаснува Џејмс.

Просекот на годишната сметка за струја од 1 октомври, кога ќе има нова цена за струјата, се очекува да надмине 3.500 фунти (4.140 долари). Тоа, според Канцеларијата за национална статистика (Office of National Statistics), е за 11 проценти повеќе од просечниот расположлив приход на домаќинствата.

На крајот, трошоците за енергија би можеле да одземат дури 17 отсто од приходот на домаќинствата следната година ако владата не обезбеди поголема поддршка.

Долговите на потрошувачите веќе се во пораст. Обично на лето луѓето ги намалуваат долговите што ги набилдале за време на зимата, кога трошат повеќе струја. Но, овој пат не е тоа случај. Напротив, долговите во текот на летово се зголемија и дури срушија рекорди. Ситуацијата може уште да се влоши кога сметките за струја дополнително ќе се зголемат во зимскиот период.

Иницијативата „Не плаќај Велика Британијо“ собра над 110.000 потписи од луѓе кои ветуваат дека нема да ги плаќаат сметките за енергија во знак на протест.

Справувањето со кризата е голем предизвик за следниот премиер, а мали се шансите за нова политика додека Лиз Трас или Риши Сунак не ја преземат функцијата. Енергетската индустрија бара од владата да обезбеди поголема помош, надвор од ветената поддршка од 400 фунти (475 евра) за секое домаќинство.

„Големата загриженост што ја имаме во моментов е неможноста на клиентите да ги сервисираат зголемените сметки и потребно е владата итно да дејствува во врска со тоа“, вели Ден Алчин, директор на Energy UK, здружение на енергетската индустрија во Обединетото Кралство кое брои над 100 членови.

Според Кит Андерсон, главен извршен директор на Scottish Power Ltd., еден од најголемите снабдувачи со енергија за домаќинствата во Обединетото Кралство, ако државата се одлучи да помогне со замрзнување на цените на сегашното ниво во следните две години за да им помогне на домаќинствата, тоа ќе ја чини околу 100 милијарди фунти (118 милијарди евра).

Некои од добавувачите нудат грантови за корисниците да го надоместат нивниот енергетски долг.

Некогаш незамисливите идеи сега земаат замав во борбата против енергетската криза во ОК

Потрошувачите кои не плаќаат може да добијат репрограмирање на отплатата на долговите или дури и прекин на отплатата на одреден временски период бидејќи од снабдувачите со енергија се бара да вложат максимални напори за да им помогнат на луѓето преку олеснување на условите за отплата на долговите. Тука постои ризикот дека некои компании не можат да се носат со големите ненаплатени побарувања од потрошувачите, што може да ги доведе дури до згаснување на бизнисот.

Тој ризик ќе се зголеми паралелно со покачување на цената на енергенсите за следната година.