Лагард: Сега е можност за посилно евро на глобален план

Нестабилната политика на претседателот Доналд Трамп претставува „одлична можност“ за зајакнување на меѓународната улога на еврото и овозможување на европската монетарна унија да ужива повеќе од привилегиите што досега беа резервирани за САД, изјави претседателката на Европската централна банка, Кристин Лагард.

Ако националните влади успеат да ги решат прашањата што долго време го ограничувале економскиот потенцијал на Европската Унија, може да бидат наградени со пониски трошоци за задолжување, како и со заштита од валутни флуктуации и санкции, рече Лагард во говор во Берлин.

„Тековните промени создаваат можност за ’глобален момент на еврото‘“, изјави таа во понеделникот. „Ова е одлична шанса за Европа да преземе поголема контрола врз својата судбина. Но тоа не е привилегија што ќе ни биде едноставно дадена. Мораме да ја заслужиме“.

Нејзините коментари покажуваат како европските креатори на политики се обидуваат да ги претворат нападите на Трамп врз глобалната трговија и американските институции во сопствена предност. Таквите аспирации добија поддршка и од инвеститорите, кои почнаа со распродажба на  доларот поради трговскиот хаос, што доведе до зајакнување на еврото - тренд што Лагард претходно го нарече „контраинтуитивен“, но оправдан.

Во понеделничкиот говор таа потсети на претходни моменти кога постоеше ризик за позицијата на доларот како водечка резервна валута, вклучувајќи ја и суспензијата на златниот стандард од страна на Ричард Никсон во 1970-тите. Додека тогаш не постоела сериозна алтернатива, денес постои еврото — „друга меѓународна валута покрај доларот“, рече Лагард.

 

Американскиот долар доминира во светските официјални резервни валути

Bloomberg Mercury

 

Во својот најнов извештај по ова прашање, ЕЦБ забележа дека меѓународната улога на еврото останала „во голема мера стабилна“ во 2023 година. Лагард посочи три области што се клучни за зајакнување на неговиот глобален статус.

Прво, таа повика на „стабилна и кредибилна геополитичка основа преку постојана посветеност на отворената трговија, поддржана со безбедносни капацитети“.

Второ, повторно ги повика европските земји да го довршат единствениот пазар, да ги поддржат стартапите, да ја намалат регулацијата и да ја изградат унијата за штедење и инвестиции - процес што се движи многу бавно.

Лагард повторно нагласи дека треба да има повеќе заедничко финансирање на европско ниво за мерки како одбраната - идеја што предизвикува политички поделби. Напредокот во оваа насока би значел дека инвеститорите би имале подлабок пазар на сигурни хартии од вредност, рече таа.

„Економската логика ни вели дека јавните добра треба да се финансираат заеднички“, рече Лагард. „А ова заедничко финансирање може да биде основа за постепено зголемување на понудата на сигурни средства во Европа“.

Ова се совпаѓа со неодамнешните изјави на членката на Извршниот одбор на ЕЦБ, Изабел Шнабел, дека голем и ликвиден пазар на европски обврзници е предуслов за поголема глобална улога на еврото.

Конечно, Лагард рече дека Европа мора да покаже способност да ја зачува стабилноста на својот правен и институционален поредок за да ја зајакне довербата на инвеститорите во долгорочната вредност на нејзината валута.

На посебен настан во Берлин, претседателот на германската Бундесбанк, Јоаким Нагел, ги повтори ставовите на Лагард, велејќи дека Европа мора да соработува поблиску и да покаже поголема отпорност.

„Можеби бевме премногу наивни во минатото, верувајќи дека работите секогаш ќе продолжат како што биле“, рече тој. „Сега мора да работиме на себе. Треба повторно да го обмислиме  европскиот економски модел, нашата одбранбена политика и како да станеме понезависни“.

 

Во моментов нема коментари за веста. Биди прв да коментира...

Остави коментар