Трамп пак се премисли - го одложи воведувањето царини од 50 отсто за ЕУ до 9 јули

Американскиот претседател Доналд Трамп изјави дека ќе го продолжи рокот до 9 јули, кога Европската Унија (ЕУ) ќе се соочи со царини од 50 проценти. Ова е одлука донесена по неговиот телефонски разговор со претседателката на Европската комисија, Урсула фон дер Лајен.

„Имавме многу убав разговор и се согласив да го поместиме рокот“, изјави Трамп за новинарите во неделата на аеродромот „Мористаун“ во Њу Џерси на враќање кон Вашингтон.

Фон дер Лајен, која го предводи извршното тело на ЕУ, претходно во неделата во објава на социјалната мрежа X наведе дека „Европа е подготвена брзо и решително да ги продолжи разговорите“, но „за добар договор ќе биде потребно време до 9 јули“. Тоа е датумот на кој првично беше закажано да заврши 90-дневната пауза на Трамп за неговите таканаречени реципрочни царини.

ЕУ требаше да воведе царина од 20 проценти според реципрочните стапки објавени во април, а привремената пауза ја намали стапката на 10 отсто до 9 јули.

Но Трамп во петокот се закани дека ќе воведе повисока царина од 50 проценти за ЕУ, почнувајќи од 1 јуни, откако се пожали дека блокот ги забавува преговорите и неправедно цели на американските компании со тужби и регулативи.

Bloomberg

 

Фјучерсите на американските и европските индекси на акции денеска се искачија заедно со азиските акции. Доларот флуктуираше откако падна на најниско ниво од декември 2023 година.

ЕУ се мачи да разбере што бара Трамп во трговските преговори. Официјалните лица сугерираа дека ЕУ и САД би можеле да ги намалат своите царини на нула за многу стоки, но Трамп се фокусира на она што тој го нарекува нетарифни трговски бариери.

Заменик-министерот за финансии Мајкл Фолкендер во емисијата „Сандеј морнинг фјучерс“ на „Фокс њуз“ (Fox News) неколку часа претходно изјави дека САД се соочуваат со „истовремен предизвик“ да преговараат со ЕУ како блок за царините, а и да се обидат да се справат со повеќето од тие нетарифни бариери во разговорите со поединечните европски земји, што создава „проблем со преговорите“.

Минатата недела ЕУ сподели обновен трговски предлог со САД во обид да ги поттикне разговорите, а шефот за трговија на блокот Марош Шефчовиќ во петокот имаше телефонски разговор со својот американски колега Џејмисон Грир.

Новата рамка на ЕУ опфаќа царински и нетарифни бариери, како и начини за подобрување на економската безбедност, меѓусебните инвестиции, стратешките купувања и соработката во глобалните предизвици, според луѓе запознаени со ова прашање, кои побараа анонимност за да разговараат за условите затоа што не се јавни.

Заканата на Трамп за царина од 50 проценти би ја погодила трговијата со стоки меѓу САД и ЕУ во вредност од 321 милијарда долари, намалувајќи го бруто-домашниот производ на САД за близу 0,6 проценти и зголемувајќи ги цените за повеќе од 0,3 отсто, според пресметките на „Блумберг економикс“.

Претседателот на САД изјави дека сака да користи царини за да ги охрабри компаниите да градат фабрики во САД, а не во странство, за производство на стоки. Истиот ден кога ја објави заканата за царина од 50 проценти за ЕУ, тој исто така се закани со царини од 25 отсто за паметните телефони произведени во странство од компании како „Епл“ (Apple Inc.) и „Самсунг електроникс“ (Samsung Electronics Co.).

Но вчера Трамп изјави дека се согласува со неодамнешните коментари на секретарот за финансии Скот Бесент дека САД не треба да го вратат производството на текстил во своите граници.

„Не сакаме да произведуваме патики и маици, туку сакаме да произведуваме воена опрема“, рече Трамп, додавајќи дека сака да произведува „големи работи“ во САД, наведувајќи ги чиповите, компјутерите и развојот на вештачката интелигенција.