Што предлага ЕУ за трговско примирје, а не е по мерка на Трамп?

Американскиот претседател Доналд Трамп го отфрли најновиот трговски предлог на Европската унија (ЕУ), кој вклучуваше реципрочно укинување на царините за индустриски стоки, подобрен пристап до некои американски земјоделски производи и соработка во развојот на центри за податоци за вештачка интелигенција (ВИ), според извори запознаени со ова прашање.

Во петокот, Трамп на социјалните мрежи објави дека ќе воведе царина од 50 проценти на целиот увоз од ЕУ почнувајќи од 1 јуни, велејќи дека преговорите „не водат никаде“. Американскиот министер за финансии Скот Бесент истакна дека понудата на ЕУ е инфериорна во однос на предлозите од другите земји и изрази надеж дека најавата на претседателот ќе „ја поттикне ЕУ на акција“.

Содржината на предлогот, претходно непозната за јавноста, вклучува тарифни и нетарифни бариери, зајакнување на економската безбедност, меѓусебни инвестиции, стратешки набавки и соработка во врска со глобалните предизвици, велат изворите. Целта на документот што ЕУ го испрати до Белата куќа претходно беше да се создаде рамка за почеток на формални преговори за трговски договор.

ЕУ, исто така, предложи соработка во бродоградбата, пристанишната инфраструктура и воспоставување енергетско партнерство меѓу ЕУ и САД, кое би вклучувало гас, нуклеарна енергија и нафта. И иако во документот не се споменува директно Кина, сепак се споменуваат непазарни практики и политики. Документот, исто така, повикува на стратешки набавки, кои би можеле да вклучуваат чипови за вештачка интелигенција и соработка во 5Г и технологии за поврзување.

Пад на берзите и доларот

Инаку, по објавата на Трамп, глобалните берзи паднаа - индексите S&P 500 и Stoxx Europe 600 паднаа за околу еден процент. Доларот се лизна на најниско ниво од 2023 година, додека приносите од американските обврзници се зголемија.

Комесарот за трговија на ЕУ, Марош Шефчовиќ, требаше во петокот да се сретне со својот американски колега Џејмисон Грир за да ја процени моменталната состојба на преговорите. Според изворот на „Блумберг“, на предлогот на САД ЕУ одговара со овој предлог, кој еден европски функционер го опиша како „список на нереални и еднострани барања“.

Доналд Трамп / „Блумберг“

Клучните елементи на европскиот предлог вклучуваат планирано намалување на царините за индустриски стоки и некритични земјоделско-прехранбени производи, клаузула што спречува воведување дополнителни американски царини за време на преговорите и можност за воведување систем на квоти, каде што повисоки царини би се применувале само над одредени количини на увоз.

Дополнителните предлози вклучуваат:

• воспоставување трансатлантски квоти и „група за надзор на челик“,
• напори за елиминирање на царините за автомобили со привремен систем на квоти,
• намалување на зависноста во фармацевтскиот сектор,
• решение за вишокот капацитети кај постарите чипови,
• поблиска соработка во областа на инвестиции и контрола на извозот,
• продлабочување на соработката во стратешките сектори: метали, автомобилски делови, фармацевтска индустрија, полупроводници и цивилно воздухопловство.

ЕУ е отворена и за договори за меѓусебно признавање на стандардите, особено во услугите и некритичната храна, при што САД и ЕУ ги задржуваат своите регулативи.

Европската унија веќе има планови да воведе царини за американски стоки во вредност од 21 милијарда евра како одговор на царините на Трамп за метали, но ја одложи нивната имплементација до средината на јули. Доколку има застој во преговорите, процесот на воведување царини би можел да се забрза.

Покрај тоа, ЕУ подготвува дополнителен список на царини за американски производи во вредност од 95 милијарди евра - кои би биле воведени доколку преговорите со Вашингтон на крајот не успеат. Меѓу целите би биле производи како што се авионите на „Боинг“ (Boeing), американските автомобили и бурбонот.

Некои земји-членки на ЕУ веќе побараа да се подготват дополнителни одмазднички мерки доколку Трамп воведе нови царини за полупроводниците и фармацевтскиот сектор.

Во моментов нема коментари за веста. Биди прв да коментира...

Остави коментар