Трамп размислува за санкции кон Русија, го нарекува Путин „луд“

Претседателот Доналд Трамп изјави дека „апсолутно“ размислува за нови санкции против Русија, откако Москва започна напади втора ноќ со смртоносни ракетни и беспилотни летала низ поголемиот дел од Украина.

Коментарите на Трамп, дадени за новинарите во Њу Џерси вчера пред да се качи на „ер форс уан“ (Air Force One), дојдоа во време кога тој е видливо фрустриран од рускиот претседател Владимир Путин и состојбата од разговорите со кои би требало да се постигне прекин на огнот во Украина.

„Не сум задоволен од она што го прави Путин“, рече Трамп. „Тој убива многу луѓе и не знам што, по ѓаволите, се случи со Путин. Го познавам долго време - секогаш се согласував со него - но тој испраќа ракети во градовите и убива луѓе, а тоа воопшто не ми се допаѓа“.

Трамп во објава на социјалната мрежа Трут (Truth Social) доцна вчера наведе дека Путин „апсолутно полудел!“

„Секогаш велев дека тој ја сака ЦЕЛА Украина, а не само дел од неа, и можеби тоа се покажува како точно, но ако го стори тоа, тоа ќе доведе до пропаст на Русија!“, рече Трамп откако се врати во Вашингтон.

Трамп месецов се олади од идејата да го зголеми притисокот врз Путин со санкции. Можностите може да вклучуваат нови санкции насочени кон руската трговија со нафта или нафтената компанија „Роснефт“ (Rosneft).

Украинските власти соопштија дека најмалку 12 лица се убиени во руските воздушни напади во текот на ноќта, што го натера украинскиот претседател Володимир Зеленски да го обнови својот повик за повеќе санкции. Нападите се совпаднаа со третиот ден од размената на затвореници меѓу Русија и Украина.

Трамп постојано прашуваше „што не е во ред“ со Путин додека им се обраќаше на новинарите на аеродромот. „Ние сме среде преговори, а тој испукува ракети врз Киев и други градови“, рече тој. „Воопшто не ми се допаѓа тоа“.

За војната, Трамп го обвини и Зеленски, заедно со Путин и поранешниот американски претседател Џо Бајден.

„Претседателот Зеленски не ѝ прави услуга на својата земја со тоа што зборува на начинот на кој зборува“, наведе тој во објавата на Трут. „Сè што излегува од неговата уста предизвикува проблеми, не ми се допаѓа, и подобро е да престане“.

Во моментов нема коментари за веста. Биди прв да коментира...

Остави коментар