Претседателот на „Алибаба“ порачува азиските компании да бараат раст надвор од ЕУ

Претседателот на „Алибаба груп холдинг“ (Alibaba Group Holding Ltd.), Џо Цаи, изјави дека азиските компании раст можат да бараат меѓу азиските можности и европскиот пазар бидејќи тензиите меѓу Вашингтон и Пекинг продолжуваат.

Цаи, исто така, имплицитно ја критикуваше трговската војна на администрацијата на американскиот претседател Доналд Трамп за време на денешната технолошка конференција во Макао, велејќи дека „некои влади се обидуваат да го урнат овој мост што го изградивме меѓу Азија и остатокот од светот“.

„Всушност, постои многу азиска деловна активност, ангажман што може да се случи меѓу источноазиските земји, меѓу Источна и Југоисточна Азија, а на крајот и Јужна Азија“, изјави Цаи пред публиката на „Бијонд Експо“ (Beyond Expo). Тој додаде дека Европа е „неверојатна можност“ за азиските компании.

Основните бизниси на „Алибаба“ станаа жртва на продолжените тензии меѓу САД и Кина. Акциите на компанијата паднаа оваа недела откако „Њујорк тајмс“ (New York Times) објави дека администрацијата на Трамп изразила загриженост во врска со потенцијалниот договор за вештачка интелигенција на „Епл“ (Apple) со кинескиот лидер во е-трговијата, што е важна победа за компанијата со седиште во Хангжу.

Иако „Епл“ не зборуваше јавно за таквото партнерство, Цаи претходно го потврди спојувањето, иако не прецизираше дали „Алибаба“ ќе биде ексклузивен снабдувач со вештачка интелигенција за американската компанија во Кина.

Локален партнер би можел да помогне во оживувањето на продажбата на ајфон (iPhone) во Кина, која страдаше бидејќи конкурентите како „Хуавеј“ (Huawei Technologies Co.) лансираа паметни телефони со вештачка интелигенција. „Епл“ сè уште не го обезбеди својот целосен пакет функции за вештачка интелигенција во Кина поради регулативите што бараат од компанијата да соработува со локално акредитирана фирма.

Работата со е-трговија на „Алибаба“ беше погодена и од одлуката на Трамп да го укине царинското ослободување за мали пратки од континентална Кина и Хонгконг.

Разочарувачките резултати на „Алибаба“ минатата недела доведоа до најголем пад на акциите на компанијата во повеќе од еден месец. Инвеститорите се загрижени за тоа дали лидерот во е-трговијата може да ја надмине постојаната кинеска економска слабост и да има корист од својот статус како еден од предводниците во бумот на вештачката интелигенција инспириран од „Дипсик“ (DeepSeek).

Но, Цаи денеска ги бранеше перспективите на „Алибаба“, велејќи дека компанијата е на „многу добар пат“ и го повтори фокусот на компанијата на е-трговијата и вештачката интелигенција.

Враќањето на компанијата по години владина контрола е оркестрирано од Цаи и главниот извршен директор Еди Ву - двајца од најдоверливите соработници на коосновачот Џек Ма. Откако го презедоа кормилото во 2023 година, тие ги пренасочија трошоците кон создавање вештачка интелигенција и е-трговија, истовремено забрзувајќи ја продажбата на неосновните средства за да ги финансираат инвестициите во вештачката интелигенција и меѓународната експанзија.

„Алибаба“ лансира производи за вештачка интелигенција со брзо темпо откако годинава „Дипсик“ се појави на глобалната сцена. Компанијата се издигна на врвот на кинеската индустрија за вештачка интелигенција благодарение на серија брзи подобрувања и воведувања на моделите, вклучувајќи го и објавувањето на нивниот водечки модел Qwen3 минатиот месец, за кој велат дека е конкурент на „Дипсик“ и тоа на неколку фронтови.

 

Во моментов нема коментари за веста. Биди прв да коментира...

Остави коментар