Канада најави дека во септември ќе ја признае палестинската држава, што палестинскиот претседател Махмуд Абас го нарече „историска одлука“, а американскиот претседател Доналд Трамп го дочека тоа „на нож“.
Палестинското Министерство за надворешни работи ја нарече одлуката „храбра и принципиелна“, нагласувајќи ја нејзината важност за правдата и правото на Палестинците на самоопределување, додека Трамп на својот профил на социјалните мрежи наведе дека најавата за признавање ќе биде пречка во постигнувањето трговски договор меѓу САД и Канада. Инаку, и Франција и Велика Британија размислуваат за признавање на Палестина како држава.
Дојде и први август, крајниот рок на Трамп за царините. Што знаеме досега?
Денеска е први август, денот кога истекува крајниот рок за постигнување трговски договор со САД, во спротивно ќе стапат во сила царините што претседателот Доналд Трамп ги објави во април. На фамозниот „Ден на ослободувањето“, како што го нарече 2 април, Трамп објави долг список на царини за стоки што пристинуваат во САД од речиси секоја земја во светот, вклучувајќи и покачени реципрочни стапки за одредени држави.
Примената на царинските стапки оттогаш двапати се одложуваше, еднаш за 9 јули, а потоа за први август. Ја анализираме моменталната состојба на новиот трговски поредок што го наметна американскиот претседател.
„Македонски телеком“: Фокус на дигитализацијата и дигиталната безбедност
Во 2025 година „Македонски телеком“ го насочи фокусот кон дигитализацијата и дигиталната безбедност, како што беше предвидено на почетокот од годината. Тоа не е изненадување, со оглед на тоа што од основната дејност, поради заситеноста на пазарот, компанијата не би можела да оствари значаен раст на приходите во споредба со минатата година.
Главниот адут на кој игра компанијата се развојот и искористувањето на силната инфраструктура, што се гледа во растот на капиталните вложувања (CAPEX) од 61,6 отсто на годишно ниво во првата половина на 2025 година. Го анализираме работењето на оваа компанија.
Финансиски извештаи на македонски компании
Во првата половина од годинава „Макпетрол“ оствари вкупен приход од 14,48 милијарди денари, што е за 0,69 отсто повеќе во однос на лани. Добивката по оданочување на најголемиот трговец со нафтени деривати во земјава за првата половина од годината изнесува 464,19 милиони денари. Таа е за пет отсто поголема од истиот период лани, но е за 14,47 отсто помала од планираната. „Макпетрол“ до крајот на септември ќе исплати дивиденда за 2024 година во бруто-износ од 424.804.800 денари, односно 4.200 денари бруто по акција.
Првото полугодие од 2025 година „Реплек“ го заврши со значаен раст на приходите од продажба во сегментот фармација за 22 отсто, евидентен како на домашниот така и на странските пазари. Консолидираната нето-добивка достигна 130 милиони денари (2,11 милиони евра), што е пораст за 90 отсто во однос на истиот период лани, соопшти компанијата. Во јуни годинава „Реплек“ исплати дивиденда во бруто-износ од 400 денари по акција, што е раст од 33 отсто во однос на исплатената дивиденда за 2023 година.
Пет нови авиолинии од Скопје до крајот на годинава
Распоредот на летови од скопскиот аеродром се зголемува за уште пет нови дестинации. Имено, министерот за транспорт Александар Николоски вчера објави дека од Меѓународниот аеродром Скопје ќе бидат воведени пет нови авиолинии. Од ноември од Скопје ќе се лета до Мадрид и Стокхолм, а од декември до Прага, Бари и Келн.
„Опен еј-ај“ го лансира „Старгејт“ во Европа преку Норвешка
„Опен еј-ај“ се согласи да биде главен клиент за нов центар за податоци во Норвешка, првата европска локација за инфраструктурниот потфат „Старгејт“ (Stargate) на компанијата за вештачка интелигенција.
Компанијата за центри за податоци „Енскејл глобал холдингс“ (Nscale Global Holdings Ltd.) ќе го изгради објектот со финансирање од норвешкиот инвеститор „Акер“ (Aker ASA), соопштија вчера компаниите. Локацијата, која ќе биде во заедничка сопственост на двете европски компании, има почетна цел да испорача капацитет од 230 мегавати, со план за дополнителни 290 мегавати. Центарот ќе биде изграден во Квандал, сместен покрај еден од норвешките фјордови, и ќе се напојува со обновлива енергија.
.webp){kind=icon}
Во моментов нема коментари за веста. Биди прв да коментира...