Отворена истрага за контаминирана храна за бебиња од „Нестле“, „Лакталис“ и „Данон“

Канцеларијата на јавниот обвинител во Париз отвори истраги за наводно контаминирана формула за бебиња дистрибуирана од „Нестле“ (Nestlé SA), „Данон“ (Danone), „Лакталис“ (Groupe Lactalis) и уште два бренда.

Истрагата вклучува потенцијални обвиненија за „измама во врска со стока што претставува опасност за здравјето на луѓето“, што може да доведе до затворска казна до седум години и казни од 3,75 милиони евра (4,45 милиони долари), соопшти обвинителството во петокот.

Истрагите, предводени од одделот за јавно здравје на канцеларијата, ќе се обидат да утврдат потенцијална одговорност за загрозување на животи со кршење на правилата за безбедност, неотповикување на контаминирани производи и други прекршувања.

„Нестле“, „Данон“ и „Лакталис“не одговорија веднаш на барањата за коментар надвор од работното време.

Трите големи прехранбени компании повлекоа некои производи во неколку земји откако органите за безбедност на храната на Европската унија препорачаа пониски нивоа на токсини минатата недела. Исто така, вмешани во истрагата во Париз се „Бејбибио“ (Babybio) и „Ла марки ен моинс“ (La Marque En Moins).

Канцеларијата во Париз соопшти дека истрагата ќе се координира со истрагите за смртта на неколку бебиња од страна на обвинителите во Бордо, Анже и Блоа. Проблемот е во можното присуство на цереулид, токсин што се поврзува со контаминација на масло од арахидонска киселина, компонента што често се додава во формулата за бебиња.