Инфлацијата во ЕУ скокна од 9,8 отсто во јули на 10,1 отсто во август

Годишната стапка на инфлација мерена со усогласениот индекс на потрошувачките цени на ниво на целата Европска унија скокна на 10,1 отсто во август од 9,8 отсто во јули, објави Евростат.

Во еврозоната, регион составен од 19 членки на Унијата кои делат заедничка валута, растот на цените се забрза од 8,9 отсто во јули на 9,1 отсто во август.

Според податоците на Евростат, балтичките земји имаат најголема инфлација. Во Естонија таа изнесуваше дури 25,2 отсто, а и Летонија и Литванија не можат да бидат задоволни со своите стапки од 21,4 отсто и 21,1 отсто, соодветно.

Од друга страна, Франција е единствената земја каде што годишниот раст на цените во август е под седум отсто, односно изнесува 6,6 отсто. На Франција, во групата земји со најниска инфлација, друштво ѝ прават Малта со скок на цените од седум отсто и Финска, каде цените во август биле за 7,9 отсто повисоки од истиот месец претходната година.

Хрватска во друштво на Словенија и Романија

Со пораст на цените од 12,6 отсто, Хрватска е во друштво на земји како соседната Словенија, каде цените пораснаа со стапка од 11,5 отсто и Романија, каде инфлацијата беше 13,3 отсто.

Податоците за скокот на цените во еврозоната, кои ја потврдија првата проценка објавена на крајот од август, значат дека не треба да се очекува дека Европската централна банка (ЕЦБ) наскоро ќе почне да размислува за олабавување на монетарната политика. Во еврозоната најголем придонес во стапката на инфлација имаат цените на енергенсите, а потоа цените на храната, алкохолните пијалоци и тутунот, се вели во соопштението на Евростат.

Во моментов нема коментари за веста. Биди прв да коментира...

Остави коментар