Владата го либерализира задолжителното пензиско осигурување

Владата подготвува предлог-закон за изменување и дополнување на Законот за задолжително капитално финансирано пензиско осигурување со кој се превидува воспоставување на три вида на портфолија во рамки на задолжителните пензиски фондови: растечко, балансирано и конзервативно портфолио. Станува збор за  посебни делови на задолжителниот пензиски фонд односно таканаречени мултифондови кои се разликуваат согласно нивото на инвестиционен ризик и структурата на вложувања.

Според надлежните, постојната едностепена структура на инвестирање на задолжителните пензиски фондови е проблематична бидејќи не овозможува усогласување на инвестицискиот ризик со возраста на членовите на задолжителните пензиски фондови. Тоа резултира со недоволна заштита за членовите кои се блиску до пензија и ограничени можности за повисок принос кај помладите членови.

Во иднина се предвидува утврдувањето на видот на портфолио да се врши во зависност од возраста на членовите на задолжителните пензиски фондови.  

„Со воведување на повеќе фондови со различно ниво на ризичност се овозможува обезбедување поголем очекуван принос за помладите членови на задолжителните пензиски фондови преку повисоко ризични портфолија, зголемување на стабилноста за членовите кои се приближуваат кон пензија преку преминување во балансирани портфолија кои комбинираат принос и умерена заштита од пазарни флуктуации, намалување на ризичноста со приближување кон пензионирање, со цел заштита на досега акумулираните средства преку конзервативни стратегии на инвестирање и минимизирање на можните пазарни шокови во завршната фаза од членството“, се наведува во предлог-законот.

Што се менува?

Според предложената регулатива, при потпишување на договор за членство со друштвото кое управува со избраниот задолжителен пензиски фонд, осигуреникот избира едно од портфолијата на тој задолжителен пензиски фонд и тоа: растечко, балансирано или конзервативно.

При изборот на видот на портфолио осигуреникот треба да се води од навршените години на живот при што осигуреник на возраст до 45 години може да избере растечко или балансирано портфолио, осигуреник на возраст од 45 години до 57 години може да избере растечко, балансирано или конзервативно  портфолио, а осигуреник на возраст над 57 години на живот може да избере балансирано или конзервативно портфолио.

„Пред потпишувањето на договорот друштво или друштво за управување со задолжителни и доброволни пензиски фондови и неговите агенти се должни да го информираат членот на задолжителниот пензиски фонд за правилата за избор на вид на портфолио според возраста“, пишува во предлог-законот.

Доколку осигуреникот не избере вид на портфолио или избере вид на портфолио кое не е во согласност со правилата, друштвото задолжително го вклучува во портфолио согласно следните правила: осигуреник на возраст до 45 години во растечко портфолио; осигуреник на возраст од 45 години до 57 години во балансирано  портфолио и осигуреник на возраст над 57 години во конзервативно портфолио.

„Се очекуваат позитивни економски влијанија во делот на подобрување на стабилноста и предвидливоста на пензискиот систем, што може да придонесе кон повисока доверба и зголемување на вкупните вложувања.  Овие новини ќе придонесат кон долгорочното штедење и раст на средствата под управување, со што се зајакнува домашниот финансиски пазар. На овој начин ќе постигнеме  усогласување со меѓународни стандарди што може да го подобри кредитниот рејтинг и инвестицискиот амбиент“, се наведува во предлог-законот.

Слични новини и кај доброволното пензиско осигурување

„Блумберг Адрија“ неодамна објави дека Владата подготвува Закон за доброволно капитално финансирано пензиско осигурување со кој се воведуваат различни инвестициски портфолија во доброволните пензиски фондови зависно од животниот циклус на членовите. Слично како и сега кај задолжителното пензиско осигурување, со предлог-законот се предлага воспоставување на три вида на портфолија во рамки на задолжителните пензиски фондови: растечко, балансирано и конзервативно портфолио – кои претставуваат посебни делови на доброволниот пензиски фонд и се разликуваат согласно нивото на инвестиционен ризик и структурата на вложувања.

Утврдувањето на видот на портфолио ќе се врши во зависност од возраста на членовите на доброволните пензиски фондови во доброволно капитално финансирано пензиско осигурување.

 

Пензиските друштва долго бараа промени

„Блумберг Адрија“ пред речиси две години одржа тркалезна маса на која претставници на три пензиски друштва во Македонија дебатираа за потребата од промени во регулативата за понатамошен развој на капитално финансираното пензиско осигурување. Тие уште тогаш посочија дека една од причините што го кочат понатамошниот развој на пензискиот систем и напорите да се обезбеди поголема социјална сигурност за пензионерите во Македонија се ограничувањата на можностите за инвестирање на фондовите, кои се принудени најголем дел од инвестициското портфолио да пласираат во нискоризични хартии од вредност.

На тркалезната маса беа посочени примери на земји кои веќе имплементирале лајвсајкл фондови, односно мултифондови со кои членовите се делат по возраст на три различни портфолија, односно три различни инвестициски политики.

Всушност, Владата со предложената регулатива излегува во пресрет на барањата на пензиските друштва и воведува рамка за развој на пензиското осигурување.