„Стандард и Пурс“ и „Фич“ ги потврдија кредитните рејтинзи на Македонија

Агенциите за кредитен рејтинг „Стандард и Пурс“ (Standard & Poor’s) и „Фич“ (Fitch Ratings) во своите редовни полугодишни оценки го потврдија стабилниот кредитен профил на Македонија, соопшти Министерство за финансии.

Како што информираат од Министерството, од „Стандард и Пурс“ спровеле редовен полугодишен преглед во согласност со календарот за суверени рејтинзи за регионот ЕМЕА (Европа, Блискиот Исток и Африка). Овој тип на ревизија претставува вообичаена процедура утврдена со европската регулатива, при која се анализираат актуелните макроекономски и фискални показатели, како и движењата на финансиските пазари.

Во рамки на последниот преглед не било објавено ново аналитичко ажурирање, што, според Министерството, укажува дека основните фактори кои го определуваат кредитниот рејтинг на државата остануваат непроменети.

Истовремено, „Фич“ минатиот месец ја извршилe својата редовна ревизија, при што резултатот бил означен како „Review – No Action“. Ова значи дека не е направена промена на постојниот кредитен рејтинг, ниту пак ќе биде објавен дополнителен извештај.

Со ваквите оценки, двете агенции практично го потврдуваат постојниот кредитен профил на државата, при непроменети клучни економски параметри. Според последните достапни извештаи, „Стандард и Пурс“ го задржува рејтингот на ниво „BB-“ со стабилен изглед, додека „Фич“ го потврдува рејтингот „BB+“, исто така со стабилна перспектива.

Од Министерството оценуваат дека ваквата потврда претставува јасен сигнал за стабилноста на макроекономската политика, умереното ниво на јавниот долг и капацитетот на државата редовно да ги сервисира своите финансиски обврски. Дополнително, тоа укажува и на континуитет во спроведувањето на економските политики, како и на отпорноста на економијата во услови на засилена глобална неизвесност.

Кредитните агенции, како што се наведува, го поврзуваат економскиот раст со зголемените јавни инвестиции, особено во инфраструктурата, како и со растот на приватната потрошувачка.

Министерката за финансии Гордана Димитриеска-Кочоска оцени дека потврдата од двете водечки меѓународни агенции претставува значаен сигнал за доверба во економските политики на земјата, но и дополнителен поттик за продолжување на реформските процеси, со цел обезбедување одржлив економски раст и повисок животен стандард.

Кредитниот рејтинг, воопшто, е еден од клучните индикатори за инвеститорите и меѓународните финансиски пазари, бидејќи ја одразува перцепцијата за ризикот и довербата во економската политика и институционалниот капацитет на една држава.