Српската компанија „Ананас“ (Ananas E-commerce) во сопственост на групацијата „Делта холдинг“, следната недела официјално ќе стане сопственик на македонската платформа за е-трговија „Групер“ (grouper.mk), изјави извршниот директор Марко Царевиќ за „Блумберг Адриа“.
Царевиќ во телевизиското гостување рече дека ИТ системот на Grouper ќе остане под досегашниот сопственик, компанијата Paiten, која е дел од полската групација Asseco SEE, додека Ananas ќе го преземе бизнисот поврзан со онлајн купувањето.
Главната цел за преземање на мекедонската компанија е регионално проширување, а Царевиќ не ја исклучува можноста Ananas, доколку има добри можности, да направи уште една аквизиција во регионот.
Со купувањето на Grouper, српската компанија добива сериозна база на корисници, база на трговци и луѓе, вели тој и додава дека со ова преземање на компанија на македонскиот пазар, тие заштедуваат една година работа, онолку колку што ќе им требло доколку почнеле „од нула“.
Според Царевиќ, Ananas најмногу се фокусира на логистиката при развојот на бизнисот и досега постигнале две третини од испораките да одат од нивниот магацин.
„Веќе денес сме на ниво на кое би се гордеел дури и еден Amazon, 95 отсто од испораките нарачани до полноќ, низ Србија пристигнуваат следниот ден“, објаснува тој.
Повеќе детали за преземањето и ширењето на компанијата во регионот, дознајте во видеото.
Инаку македонската редакција на Блумберг Адриа веќе пишуваше за оваа аквизиција. „Ананас е-комерц“, фирма во сопственост на српската групација „Делта Холдинг“ ја извести Комисијата за заштита на конкуренцијата за концентрацијата дека сака да се стекне со целосна контрола врз македонската компанија „Вебспот“ во чија сопственост се „Групер“, како и платформата за електронска трговија „Пао Пао“ (paopao.mk).
„Групер“ е една од првите и најпознати платформи за електронска трговија во Македонија, а еден од основачите е Нина Ангеловска, поранешна министерка за финансии во македонската Влада. Таа во меѓувреме најави дека почнува со работа на нова позиција во „Ананас“.
„Претстои нов возбудлив предизвик. Среќнa сум што се приклучувам кон „Ананас е-комерц“ како извршна директорка за меѓународен бизнис развој и ќе можам да придонесам во градењето на регионалниот гигант за е-трговија“, напиша Ангеловска на нејзиниот профил на „Линкдин“.
.webp){kind=icon}
