Во согласност со податоците на даночната управа, во земјава има 104.507 активни даночни обврзници, правни лица, регистрирани во сите региони во државата, од кои 27.711 се со жени управители.
Сите заедно, во согласност со поднесените даночни биланси, обезбедуваат приход во вредност од близу 230 милијарди денари и обезбедуваат работни места и плати за 121.693 работници. Сите овие компании ги развиваат регионите каде што работат, успешно нè претставуваат на домашните и на светските пазари и континуирано придонесуваат во растот на БДП. Ова го истакна директорката на Управата за јавни приходи, Сања Лукаревскa, на отворањето на вториот самит за женско претприемаштво, насловен „Инспиративна иднина“, кој се одржува денеска и утре, во рамките на Националната платформа за женско претприемаштво (НПЖП), проект кофинансиран од ЕУ.
„Лично верувам дека фактот што сме жени е бенефиција, затоа што имаме природен талент од едно да направиме две. Да бидеме организатор на домот, на семејството и токму овие природни дарби треба да ги искористиме и насочиме кон градење родово перспективна иднина, со цел подобрување на економската состојба на жените“, рече Лукаревска.
Таа нагласи дека жени претприемачи низ целата држава успешно менаџираат микро, мали и средни претпријатија во областа на финансиите, услужните дејности, медицината, модниот дизајн, но ги има и во градежништвото, транспортот и логистиката. Тоа се, како што рече Лукаревска, професионални менаџерки, кои знаат како се игра во борбата за нов пазар.
МИА
Заменик-министерот за економија Зоран Маневски во своето обраќање се осврна на годишната награда за жени претприемачи што ја воведе Министерството за економија како институционален покровител на НПЖП, која им се доделува на најдобрите компании во сопственост и во управување од жени, врз основа на официјалните податоци од завршните сметки на претпријатијата во последните три години, според следните критериуми: основната дејност да не е трговија, да се активни во последните три години, претпријатието да биде во сопственост на жена над 50 проценти и управител да биде жена, да биде минимум 51 отсто во домашна сопственост, секоја наредна година да остварува поголем приход, секоја година да остварува добивка, секоја наредна година да го зголемува бројот на вработени и во регистарот на вистински сопственици да биде евидентирано како жена сопственик.
„Според добиените податоци од Централниот регистар, бројот на компании што се селектирани според истите критериуми во 2021 во однос на 2020 година е зголемена од 51 на 73 компании, односно повеќе за 43 проценти, што претставува значаен показател дека се постигнати поставените цели за поттикнување на жените за почнување сопствен бизнис. Селектираните 73 компании во сопственост и управувани од жени во сите плански региони навистина заслужуваат признание за остварените резултати. Во периодот од 2019 до 2021 година, овие 73 компании успеале да го зголемат бројот на вработени за околу 57 отсто, а добивката дури за 112 проценти. Оттаму, можеме да констатираме дека мерките за стимулирање на жените за започнување свој бизнис, кои Владата ги реализира секоја година, како и активностите што произлегуваат од Стратегијата за развој на женското претприемаштво, ја постигнаа целта. Затоа, повеќе од потребно е да се наградуваат ваквите успешни компании, кои се мотивација за сите други“, рече Маневски.
На самитот беа доделени и наградите за најдобри претприемачки во микро, мали и средни претпријатија, кои платформата ги доделува во соработка со Министерството за економија.
Наградата за најдобра жена претприемач во категоријата на микропретпријатија ја доби Даниела Јосефска од „Јосефски консалтинг“, сметководствено биро во Кочани, во категоријата мали претпријатија ја добија „Сакам книга“ и сопственичката Ивана Спасев, а во сферата на средните претпријатија ја добија Славица Алексовска и компанијата „Сатекс“ од Прилеп.
.webp){kind=icon}
