Цената на струјата се доближи до 400 евра за мегават-час

Цената на струјата на унгарската берза HUPX утрово стигна до близу 400 евра за мегават-час. Ова е највисоката цена по која се тргува електричната енергија во последните два месеца. Домашните компании се снабдуваат со струја по цените на оваа берза.

Во вакви услови, државната компанија „ЕСМ продажба“ продолжува да купува струја. За утре е планирана нова набавка, во вредност од околу осум милиони евра. Треба да бидат набавени 23.240 мегават-часа струја за првите четири дена од декември.

Набавката на оваа струја се совпаѓа со почетокот на мерката на Владата за снабдување со субвенционирана струја на компаниите што произведуваат основни прехранбени производи (масло за јадење, леб и пекарски производи, брашно, млеко и млечни производи, месна и живинарска индустрија). За нив цената на струјата од утре ќе изнесува 80 евра за мегават-час. Субвенционирана струја ќе има и за основните и средните училишта, и тоа по цена од 95 евра за мегават-час, исто како и за јавните претпријатија од областа на  водоснабдувањето и одведувањето на отпадните води, кои работат со пумпни и пречистителни станици.

Овие субјекти ќе плаќаат поевтина струја до 30 април идната година, кога ќе истече кризната состојба во енергетиката.

Во изминатото деноноќие преку „ЕСМ продажба“ се набавени и 4.580 мегават-часа електрична енергија. „Тоа е електрична енергија наменета за болници, градинки, училишта и објекти од виталната инфраструктура во државата“, соопшти Владата.

Инаку, вчера АД ЕСМ произведе 12.636 мегават-часа електрична енергија, со што целосно ги задоволи потребите на домаќинствата и малите потрошувачи.

„Во термоцентралите се произведени 8.080, а во хидроцентралите и во ветерниот парк 4.556 мегават-часа електрична енергија“, информира Владата.

Во моментов нема коментари за веста. Биди прв да коментира...

Остави коментар