.webp){kind=icon}
Економијата забавила во третиот квартал. Според проценетите податоци на Државниот завод за статистика, БДП во периодот јули - август - септември бележи раст од два отсто, што е најмалку годинава. Растот во првиот квартал изнесуваше 2,2 отсто, во вториот, четири отсто (ова е ревидиран податок, првичната процена за БДП во вториот квартал изнесуваше 2,8 отсто).
Најголем раст во третото тримесечје од 2022 година е забележан во секторите:
- уметност, забава и рекреација; други услужни дејности; дејности на домаќинствата како работодавци; дејности на домаќинствата што произведуваат разновидна стока и вршат различни услуги за сопствени потреби од 11,8 отсто;
- трговија на големо и трговија на мало; поправка на моторни возила и мотоцикли; транспорт и складирање; објекти за сместување и сервисни дејности со храна од 9,1 отсто;
- финансиски дејности и дејности на осигурување од 5.8 отсто.
Во третиот квартал висок пад од 10 отсто бележи градежништвото, потоа индустријата од 2,9 отсто и рударството од 1,7 отсто.
Финалната потрошувачка на домаќинствата, вклучувајќи ги непрофитните институции што им служат на домаќинствата, во третото тримесечје од 2022 година, номинално расте за 18,2 отсто, а нејзиното учество во структурата на бруто-домашниот производ изнесува 71,2 отсто. Во истиот период, извозот на стоки и на услуги номинално се зголеми за 27.2 отсто, а увозот на стоки и на услуги забележа пораст во номинален износ од 31.1 отсто.
Бруто-инвестициите во третото тримесечје од 2022 година бележат најголемо покачување во делот на промената на резервите.
