Некаде до крајот на првиот квартал годинава се надевам дека во владина, а потоа и собраниска процедура ќе влезе еден пакет на законски измени, вели во разговор за „Блумберг Адрија“ директорот на Дирекцијата за технолошки индустриски развојни зони (ДТИРЗ), Јован Деспотовски, зборувајќи за новините во концептот за поддршка на компании.
„Најпрво, тие ќе подразбираат креирање единствена точка за институционална поддршка на инвеститорите. Секако, тука станува збор за средни и големи компании, без разлика дали се странски или домашни. Второ е еден сериозен пакет на измени на Законот за технолошки индустриски развојни зони“, посочи Деспотовски.
Како што нагласи тој, со измените на Законот дополнително се либерализира пристапот до услугите во зоните, за компаниите пред сè со домашен капитал.
„Идејата е она што гледаме дека функционира и е позитивен модел во зоните да им го ставиме целосно на располагање и на поголемите домашни компании што имаат потенцијал да го остварат тој развој“, истакна директорот.
Деспотовски нагласи и дека со новата методологија за доделување државна поддршка, државата ќе стане вистински партнер за инвеститорите.
„Тоа подразбира дека врз основа на многу јасни критериуми и бројки, оние инвеститори или инвестициски планови што гарантираат подобра динамика на реализација и поголеми добивки, поголема додадена вредност ќе добиваат и подинамична поддршка. Целта е да ги поттикнеме подобрите да бидат уште подобри“.
Целиот разговор со Јован Деспотовски погледнете го во видеото прикачено во рамките на објавата.
.webp){kind=icon}
