„Диносаурусите“ и натаму ќе возат по македонските патишта

Европа за две години ќе вози со стандард Еуро 7, а во Македонија за шест месеци има новоевидентирани 104 камиони со Еуро 0. Лани, заклучно со 14 јуни, на патиштата возеле 7.352 камиони што не ги запазуваат еколошките стандарди. До завчера, пак, 25 јануари, според податоците со кои располага „Блумберг Адрија“, нивниот број се зголемил и изнесува 7.456.

Овие „диносауруси“ меѓу товарните возила најмногу се користат за сопствени потреби низ земјава, но „се тркалаат“ и низ други држави со кои Македонија разменува транспортни дозволи без ознаки за еуростандард на возилата. Тие земји се Србија, Турција, Украина, Русија. На списокот се и европските земји Хрватска, Словенија и Романија, но нашите стари камиони ретко одат таму поради екстремно високите патарини за нив.  

Сепак, меѓу овие возила, според нашите информации, не се сите без еколошки стандард, некои се со Е1, Е2 или Е3, но превозниците немаат соодветен сертификат, кој се добива по проверка што се прави секоја година, и се означуваат со Еуро 0. Но дури и да не се сите 0, сепак се стари и истрошени возила, кои дополнително влијаат на загадувањето.

Но има и добра вест во статистиката за македонските камиони. Бројот на возила со стандард Еуро 6 за последните шест месеци се зголемил за 300, кои главно им припаѓаат на компаниите што инвестираат во возниот парк за да бидат конкурентни на европскиот пазар.

Нема забрана за увоз на возила со стандард понизок од Еуро 5

Во Македонија не се стари само камионите, туку вкупниот возен парк. Просечната старост изнесува околу 20 години и таа постојано се зголемува.

Владата имаше намера да ја подобри состојбата и министерот за економија Крешник Бектеши во неколку наврати најавуваше забрана за увоз на половни возила со стандард понизок од Еуро 5. Но тоа нема да се реализира.

Планот беше забраната да стапи во сила во текот на 2021 година, па беше одложена за лани. А, сега од Министерството за економија за „Блумберг Адрија“ велат дека нема да има таква забрана, барем засега.

„Во овој момент во Министерството за економија не се размислува за измена на правилниците со кои ќе се изврши забрана на увоз на возила со ниво на емисија на издувни гасови под стандардот Еуро 5. Одлуката за промена (зголемување) на нивото на емисија на издувни гасови за возилата што се увезуваат најчесто доаѓа од Владата, а Министерството за економија ја спроведува со измена на правилниците. Кога Владата ќе расправа за донесување одлука за заострување на критериумите за увоз на половни возила, во моментов Министерството за економија нема информација“.

Од Владата, пак, кратко ни одговорија дека „доколку Владата расправа и се донесе одлука за изменување на критериумите за увоз на половни возила под стандардот Еуро 5, јавноста веднаш ќе биде известена“.

На секое ново, се регистрираат две половни возила

Тоа што ќе продолжи увозот на возила со стандард Еуро 4 значи дека во земјава и натаму ќе влегуваат возила произведени од 2007 година или стари и по 16 години. Ова се случува во услови кога 88,8 отсто од сите регистрирани возила се постари од десет години, покажуваат податоците на државната статистика за 2021 година.

Според прелиминарните податоци на Министерството за внатрешни работи, во Македонија лани имало над 550.000 регистрации, или близу 50.000 возила повеќе споредено со 2021 година.

Бројот на моторни возила што за првпат се регистрирани лани, според прелиминарните податоци на МВР, изнесува 36.785.

Ако оваа бројка се спореди во бројката од увозот на возила според Царинската управа, излегува дека за првпат на секои две половни возила, се регистрирало едно ново.

Според царинските податоци, лани во земјава влегле само 8.790 нови патнички автомобили, 1.131 товарно возило и 24 нови автобуси.

Лоша е состојбата и со автобусите. Нивната просечна старост заклучно со 2021 година изнесувала исто така близу 20 години. Се намалила во периодот на големата набавка на автобуси за скопското јавно претпријатие од Кина и Украина, а потоа повторно растела. И тие автобуси што тогашната Влада ги купи за ЈСП веќе се постари од десет години. 

Ако Владата останеше на планот за забрана на увоз на возила со под стандардот Еуро 5, тоа значи дека во земјава немаше да влегуваат возила произведени пред 2011 година. Ваква регулатива веќе постои во Босна и Херцеговина и Албанија уште од 2019 година. Во Србија, пак, правилата се полабави и може да се увезуваат и возила под стандардот Еуро 3.

 

Во моментов нема коментари за веста. Биди прв да коментира...

Остави коментар