Во првото тримесечје од годинава во Северна Македонија биле увезени 6.348 автомобили, што е намалување во однос на истиот период минатата година кога во земјава биле увезени 9.784 автомобили.
Податоците на Царинската управа откриваат дека падот се должи на намалувањето на бројот на увезени употребувани автомобили. Имено, во првиот квартал од годинава биле увезени вкупно 4.158 употребувани автомобили или два пати помалку во однос на првиот квартал од 2021 година. Во истиот период, може да се забележи благ пораст на увезените нови автомобили.
Трендот на раст на бројот на увезени нови автомобили односно зголемувањето на продажбата се разликува од оној во Европската Унија, каде што има значителен пад на пазарот на нови автомобили.
„Блумберг Адриа“ веќе објави дека според податоците на Европската асоцијација на автопроизводители (АЦЕА) во април 2022 година, регистрациите на нови патнички автомобили во ЕУ забележаа значителен пад од 20,6 отсто. Главна причина за тоа се проблемите со синџирот на снабдување коишто продолжија силно да го оптоваруваат производството на автомобили.
„Со исклучок на пандемијата во 2020 година, ова беше најслабиот априлски резултат во однос на продадените количини од почетокот на евиденцијата (684.506 продадени единици). Сите главни пазари придонесоа за негативните перформанси на регионот: Италија (-33 отсто), Франција (-22,6 отсто), Германија (-21,5 отсто) и Шпанија (-12,1 отсто).“, соопштија од АЦЕА.
Од јануари до април 2022 година, регистрациите на нови автомобили се намалени за 14,4 отсто низ ЕУ со вкупно 2.930.366 единици.
„Значителниот пад на продажбата на автомобили во март и април дополнително ги повлече кумулативните перформанси. Меѓу клучните пазари во ЕУ, Италија забележа најсилен пад (-26,5 отсто), следена од Франција (-18,6 отсто), Шпанија (-11,8 отсто) и Германија (-9, отсто).“, информираа од АЦЕА.
.webp){kind=icon}
