Оценката за економската состојба на деловните субјекти од преработувачката индустрија во мај 2022 година е понеповолна во однос на претходниот месец, а понеповолна и во однос на мај 2021 година, соопшти Државниот завод за статистика (ДЗС).
Се очекува бројот на вработените да се намали. Просечното искористување на капацитетите на деловните субјекти во мај 2022 година изнесува 65,4 проценти од нормалното искористување.
Најголемо влијание врз ограничувањето на обемот на производството имаат следните фактори: недостигот на квалификувана работна сила со 20,1 проценти, недоволната странска побарувачка со 17,9 проценти, неизвесното економско опкружување со 14,2 проценти и недоволната домашна побарувачка со 12,2 проценти.
Според оценката на раководителите на деловните субјекти, индикаторот на доверба во преработувачката индустрија во мај 2022 година е зголемен за 0.2 процентни поени во однос на април 2022 година и изнесува 13,4, а во однос на мај 2021 година е намален за 1.4 процентни поени.
„Состојбата на обезбеденоста на производството со порачки во мај 2022, во однос на април 2022 година е поповолна, очекувањата за обемот на производството во наредните три месеци се поповолни во однос на претходниот месец, а залихите на готовите производи се зголемени“, информираат од ДЗС.
.webp){kind=icon}
