Во Македонија четири пати повеќе нарачки за електрични возила од лани

Ако лани во земјава се возеле околу 150 електрични возила, очекувањата се дека до крајот на оваа година нивниот број ќе се зголеми најмалку двојно. Такви се очекувањата на продавачите на овој тип возила. Возилата на електричен погон се поскапи и затоа можеби помалку достапни за граѓаните од земјава, но Златко Муцунски, генерален директор на „Порше Македонија“, за „Блумберг Адрија“ вели дека интересот за ваков тип автомобили е во постојан пораст. „Зголемувањето е постепено, но постојано и стабилно“, вели тој.

Податоците од Царинската управа го докажуваат тој тренд. Ако се анализира популарната „тесла“, податоците се следните - во 2021 година во Македонија скромно биле увезени само три автомобили од овој тип, но веќе лани, или во 2022 година, бројката се искачила на 18. Заедно со возилата на електричен погон од други производители, според податоците на царината, во земјава лани влегле 52 електрични возила.

Бројката е мала ако се спореди со вкупниот увоз на возила во земјава, но важен е трендот, кој е нагорен. Расте увозот и на хибридни возила, лани влегле 251 таков автомобил.

„Порше“ годинава планира продажба на 200 електрични возила

„’Порше Македонија’ во 2022 година има испорачано педесетина електрични возила од марките ’фолксваген’, ’порше’ и ’ауди’. Уделот на електричните возила во нашиот вкупен пласман сè уште е мал, но нивната процентуална застапеност е во согласност со движењето на трендот на европскиот пазар“, вели Муцунски.

Во моментов на глобалниот пазар расте интересот за овој тип возила, што ги подгрева очекувањата и во земјава. Затоа, Муцунски најавува повеќекратно зголемување на продажбата до крајот на годината.

Златко Муцунски / Приватна архива

„Трендот на европскиот пазар бележи сè поизразено зголемување на уделот на електричните возила во вкупната продажба. Очекуваме споредлива динамика и кај резултатите на ’Порше Македонија’ во иднина. Колку за илустрација, за оваа година веќе имаме планирана продажба од околу 200 електрични автомобили“, вели Муцунски.

За нашите продавачи - цените ќе растат

Продавачите во земјава не очекуваат силни ценовни осцилации во текот на оваа година и покрај тоа што сите очекувања на глобалниот пазар одат во насока на ценовна стабилизација, па и корекција надолу. Според нив, исто како што ќе се зголемувале цените на моделите со мотор со внатрешно согорување, тоа ќе важело и за електричните.

Depositphotos

„Како и кај сите други производи на пазарот, без исклучок, така и кај електричните возила цените растат. За нашите модели од најновата генерација, произведени и опремени со најсовремената и најактуелна технологија и особини, во моментот цените се движат од четириесетина илјади евра, па нагоре“, вели Муцунски.

Но ќе има е-автомобили и со пониски цени, затоа што, како што вели Муцунски, во наредниот период понудата ќе биде зголемена.

„Во иднина (на краток до среден рок) очекуваме проширување на понудата и со нови, помали, но многу просторни и практични модели за значително пониски цени“, вели тој.

Во моментов нема коментари за веста. Биди прв да коментира...

Остави коментар