Продажбата на електрични возила надмина една илјада милијарди долари

Глобалната потрошувачка за електрични возила расте. Според новиот извештај објавен од „Блумберг НЕФ“ (BloombergNEF) за инвестиции во енергетската транзиција, годишната потрошувачка за патнички електрични возила достигна 388 милијарди долари во 2022 година, што е за 53 проценти повеќе од претходната година. Со вклучените податоци за 2022 година, вкупната вредност на досега продадените електрични возила во сегментот на патнички возила сега надмина една илјада милијарди долари.

Постојат неколку начини за анализа на таа бројка. На најосновно ниво, ако производителот на автомобили нема пристојна стратегија за електрични возила, тогаш го пропушта својот дел од можностите за приход од една илјада милијарди долари во последната деценија. Тоа звучи како голема бројка, но глобалната продажба на автомобили вреди околу 2,5 илјади милијарди долари годишно.

Bloomberg Mercury

 

Во тој контекст, кумулативната вредност на продажбата на електрични возила е релативно скромна. Вкупниот профит од електрични возила исто така е многу помал. Сепак, стапките на раст се важни и речиси 60 проценти од вкупната потрошувачка на електрични возила се случија само во последните 18 месеци. Оваа година повторно ќе собори рекорди со продажбата на патнички возила на електричен погон и најверојатно ќе надмине 500 милијарди долари.

Ова сега е многу важен и многу брз дел од глобалната продажба на автомобили. Автомобилската индустрија работи на долги производствени циклуси. Иако се чини дека има постојан прилив на нови производи, многу од нив се само козметички ажурирања на постојните модели, или фејслифтинг во индустриски јазик.

За да се разберат циклусите на производите и што ќе се случи следно, важно е да се погледнат платформите на возилата. Производителите на автомобили во голем обем развиваат нови платформи, кои ги поткрепуваат возилата во период од шест до десет години. На платформите им требаат години за да се развијат, чинат милијарди долари и се разновидни, дозволувајќи им на производителите на автомобили да користат различни структури на каросеријата за да се задоволи поширок спектар на преференции на потрошувачите. Овие платформи исто така овозможуваат споделување  компоненти во многу модели, што е неопходен дел од строгата економија на изградбата на возила во големи размери низ целиот свет. Долгите развојни циклуси исто така значат дека ако производителот на автомобили згреши, може да потрае доста време за да го сфати целосното влијание на грешките.

Продажбата на електрични возила од една илјада милијарди долари веројатно е точката каде што станува јасно дека некои производители на автомобили направиле погрешни облози. Јапонските производители на автомобили добро го илустрираат тоа. Сите јапонски марки заедно продадоа помалку од пет проценти од купените електрични возила на глобално ниво минатата година, а ниту една не беше меѓу првите 10 марки на електрични возила според обемот. Тоа не беше проблем во 2019 година, кога овие возила чинеа само 2,6 отсто од глобалната продажба на автомобили, но загрижувачки е кога нивниот удел се приближува до 18 проценти од продажбата во 2023 година.
Уште поекстремен случај е тој во Кина, каде што електричните возила најверојатно ќе бидат над 30 проценти од продажбата оваа година, споредено со само пет отсто во 2019 година. Тоа е огромна промена во краток временски интервал и во рамките на нормалниот животен циклус на платформите на возилата. Пазарниот удел на јапонските производители на автомобили во Кина сега почнува да се намалува на 21 отсто од продажбата на нови возила минатата година од 25 проценти, колку што беше во 2020 година.

Сега ѕвонат алармите кај јапонските производители на автомобили, при што „Хонда“ ја обнови својата стратегија за електрични возила, а „Тојота“ постави нов менаџмент за да ја издигне линијата на електрични возила. Менувањето на курсот ќе потрае некое време. „Тојота“ соопшти дека нема да има нова посветена платформа подготвена за лансирање до 2027 година. Иако процесот би можел да се забрза, сепак тоа ги одразува временските рамки на кои работат традиционалните производители на автомобили. „Тојота“ можеби сепак ќе успее. Компанијата покажа импресивна приспособливост во текот на својата 85-годишна историја, но поентата тука е дека следниот циклус на возила е апсолутно клучен за вртење на бродот. Ако ја промаши целта, последиците ќе бидат страшни.

Многу други производители на автомобили се соочуваат со слична ситуација, при што нивните платформи за модели што треба да пристигнат меѓу 2026 и 2028 година во голема мера се поставени. Ќе бидат потребни неколку години за да се открие дали ги направиле вистинските облози.

Претстојат уште многу предизвици додека продажбата на електрични возила расте. Дури и по феноменалниот раст во последно време, само околу три отсто од 1,3 милијарда патнички автомобили на глобално ниво ќе бидат електрични на крајот на оваа година. Зголемената побарувачка, исто така, прави вистински оптоварувања на синџирот на снабдување со батерии и инфраструктура за јавна полнење. Сепак, првите илјада милијарди долари, нагласени во извештајот на „Блумберг НЕФ“, го означуваат почетокот на вистинската материјалност во автомобилскиот сектор. Електричните возила сега веќе не се само восхит, туку освојуваат и реален удел на пазарот.