„БЈД“ повторно пред „Тесла“ по продажба на целосно електрични автомобили

„БЈД“ (BYD Co.) е на пат повторно да стане најголемиот светски продавач на целосно електрични автомобили, преземајќи ја водечката позиција од „Тесла“ (Tesla Inc.), бидејќи кинескиот производител извезува сè поголем број возила.

Производителот на моделот Долфин испорача 557.090 електрични возила на батерии во трите месеци заклучно со јуни, според податоците објавени во средата. Иако тоа е помалку отколку во истиот период лани, најверојатно ќе биде доволно да ја надмине „Тесла“. Според проценките на аналитичарите што ги собра „Блумберг“, американскиот производител следната недела се очекува да објави квартална продажба од околу 396.500 возила.

Акциите на „БЈД“ пораснаа за дури 8,4 отсто во раното тргување во Хонг Конг во четвртокот, што е нивниот најголем внатредневен раст од февруари 2025 година.

„БЈД“ првпат ја престигна „Тесла“ во четвртиот квартал од 2024 година, а значителната предност ја задржа и во текот на 2025 година, бидејќи политичките активности на Илон Маск и неговите блиски врски со американскиот претседател Доналд Трамп ги одвратија потрошувачите, особено во Европа.

„БЈД“ повторно ќе стане најголем светски продавач на електрични возила

Квартална продажба на целосно електрични возила на батерии

Забелешка: Продажбата на „Тесла“ за вториот квартал од 2026 година се базира на просекот од проценките на аналитичарите собрани од „Блумберг“/Извор: Company statements

 

Сепак, „Тесла“ повторно го презеде водството во првиот квартал годинава, продавајќи околу 48.000 возила повеќе од „БЈД“, бидејќи слабеењето на побарувачката во Кина негативно се одрази врз продажбата на кинескиот производител на домашниот пазар.

Вкупната продажба на „БЈД“, вклучувајќи ги сите видови погон и модели на возила, се зголеми за 5,5 отсто во јуни, на 403.472 возила. Околу 43 отсто од нив се продадени на странските пазари, што ја нагласува важноста на глобалната експанзија на компанијата.

Со оглед на тоа што кинескиот автомобилски пазар е зафатен од жестока ценовна војна, „БЈД“ се насочува кон технолошки унапредувања за да им конкурира на ривалите како „Гили“ (Geely Automobile Holdings Ltd.) и „Шаоми“ (Xiaomi Corp.).

 

 

Кон крајот на мај, „БЈД“ претстави низа новини, меѓу кои и, како што соопшти компанијата, најмоќниот кинески чип за автомобили со автономно управување, во време кога напредните системи за помош при возење стануваат клучно поле за конкуренција. Компанијата истовремено забрзано го проширува производството на новата генерација батерии блејд.

„Тесла“ започна нов бран вработувања за позиции поврзани со системите за помош при возење во Кина, по повеќекратните одложувања на воведувањето на технологијата што се смета за клучна во конкуренцијата со локалните производители.