Може ли да се очекува намалување на цените на становите и какви се најновите трендови во градежништвото и на пазарот на недвижности во Македонија и во другите земји од регионот Адрија ќе можете да прочитате следната недела, во новата анализа што ја подготви аналитичкиот тим на „Блумберг Адрија“.
Во рамките на „Блумберг бизнисвик Адрија“ истражувавме каков е потенцијалот на индустријата за домашни миленичиња, колку одвојуваат македонските граѓани од својата потрошувачка кошница за да ги покријат храната и другите трошоци за миленичињата, а колку жителите на другите земји од регионот.
Светот полека се преориентира од возила со погон на фосилни горива кон електрични возила, но засега во Македонија има скромна бројка возила со погон на струја. Една од причините за тоа е високата цена на електричните возила. Анализиравме колкави приходи се потребни за да има поголема продажба на овој вид возила.
Иако полека забавува, инфлацијата во Македонија и во Европа сè уште е многу висока. Ќе следиме каков чекор ќе повлече Европската централна банка, која во текот на следната недела треба да одлучи дали и колкаво ќе биде зголемувањето на основните каматни стапки односно дали ќе има понатамошно затегнување на монетарната политика. Во таа насока ќе објавиме и каква ќе биде политиката на Федералните резерви на САД, кои исто така треба да одлучуваат дали и каква ќе биде корекцијата на основните каматни стапки.
Енергетската криза покажа дека достапноста и цената на струјата може да имаат огромно влијание врз економските текови. Од тој аспект анализираме какво влијание врз пазарот ќе има создавањето берзи на струја во Албанија, Црна Гора и Македонија.
Македонските граѓани веќе извесен период имаат законска можност да инвестираат во акции од странски компании. За крајот на неделата анализиравме каков е интересот меѓу граѓаните за инвестирање во акции во странство.
.webp){kind=icon}
