.webp){kind=icon}
Централните банки во Македонија и во повеќето земји од регионот во изминатиов период ја затегнуваа монетарната политика за да се справат со високата инфлација. В понеделник, во новата анализа што ја подготви аналитичкиот тим на „Блумберг Адрија“, ќе можете да прочитате каков ефект имаше промената на монетарната политика врз каматните стапки на кредитите и на депозитите во Македонија и во земјите од регионот Адрија.
Германија со години е убедливо најголем трговски партнер на Македонија и една од ретките земји со кои имаме суфицит во трговската размена. Затоа е многу битно каков е растот на БДП во најголемата економска сила во Европа и какви се очекувањата за 2023 година. Со оглед на тоа што Германија од почетокот на годинава е на граница меѓу стагнација и рецесија, анализираме какви ефекти ќе имаат ваквите трендови врз македонската економија, а особено врз компаниите од автомобилската индустрија, кои во голем дел зависат од извозот во оваа земја.
Во текот на неделата ќе можете да го прочитате ексклузивното интервју што за „Блумберг Адрија“ го даде Павлос Милонас, извршен генерален директор на Националната банка на Грција (НБГ). Оваа грчка банка во Македонија ја поседува Стопанска банка, а со Милонас зборувавме и за можни други аквизиции и регионални аспирации, како и за многу други актуелни прашања. Кога станува збор за банкарскиот сектор, ќе анализираме и во каква кондиција се македонските банки, со посебен осврт кон нивната ликвидност.
Според извештајот на Светската банка за Западен Балкан, најсиромашните домаќинства ја почувствуваа инфлацијата за 3,8 процентни поени посилно во однос на просекот. Прашуваме од каде произлегуваат ваквите разлики меѓу посиромашните и подоходовните домаќинства.
Ќе анализираме каква е состојбата со наплатата на даноците во Македонија и дали е можно зголемување на даночната основа. Во фокусот на нашето внимание ќе биде и прашањето какви се профитните маржи на македонските компании, дали има промени во однос на изминатиот период и ќе ги споредиме со остварувањата на компаниите од регионот.
