Германските банки против реформата околу зелената енергија - сметаат дека ќе ги загрози новите проекти

Предложената реформа околу обновливата енергија во Германија ризикува одложување на проектите и одвраќање на инвестициите со тоа што ги отежнува нивното финансирање, според некои од најголемите банки во земјата.

Група од 18 банки ја предупредија владата дека истовремените промени во приходите, трошоците и пристапот до мрежата на проектите за обновлива енергија ќе „ја загрозат сигурноста на планирањето потребна за одлуките за инвестирање и финансирање“, се вели во писмото што го виде Блумберг. „Како резултат на тоа, проектите може да бидат одложени, намалени во обем или - ако не се економски одржливи или финансиски изводливи - повеќе нема да можат да се спроведуваат“.

Предупредувањето е најновиот знак на отпор од инвеститорите против планот на владата да ги намали субвенциите за обновлива енергија како начин за ублажување на цените на енергијата. Германските потрошувачи моментално плаќаат околу 37 милијарди евра (42,7 милијарди долари) годишно за мрежни такси, но преносната мрежа не е во чекор со брзата експанзија на обновливи извори на енергија во земјата.

Како дел од предлогот за сеопфатна реформа, на операторите на мрежата ќе им биде дозволено намалување на исплатите за кратење (curtailment payments).  Кога мрежата е преоптоварена, операторите честопати им наредуваат на ветерните и соларните паркови да престанат со производство, но сепак им плаќаат компензација (субвенција) за непроизведената струја. Владата сака да им дозволи на операторите да ги намалат овие исплати во области каде мрежата е веќе преоптоварена. Со тоа би се намалил финансискиот товар врз системот (а со тоа и врз сметките на граѓаните).

Бидејќи инвеститорите не можат да знаат кога и каде операторот на мрежата ќе прогласи таква ситуација на тесно грло во иднина, ова би можело да ги направи бизнис плановите за нови проекти непрофитабилни, според писмото од Советодавниот одбор за финансирање на Германското здружение за енергија од ветер.

Банките ќе мора да ги земат предвид ваквите ризици со користење на поконзервативни претпоставки за заработка, одржување повисоки бафери за сервисирање на долгот или намалување на нивните коефициенти на обезбедување, се вели во писмото.

„Комерцбанк“ (Commerzbank AG), „ЛББВ“ (LBBW ) и подружницата на „Уникредит“ (UniCredit SpA) , „ХипоВеренсбанк“ (HypoVereinsbank), беа меѓу потписниците. Писмото беше адресирано до Министерството за економија и Федералната агенција за мрежи.

Министерството за економија гледа потреба од акција бидејќи бумот на мрежните конекции често води до преоптоварување на мрежата и долги процедури. „Итно сакаме да спречиме ‘замрзнување на конекциите, како што се случи во Холандија“, изјави портпаролот на министерството преку е-пошта, додека одби да коментира конкретно за писмото.

Кредиторите, исто така, го критикуваат планот за ограничување на производството на енергија од сончевите централи на покривите, потег за ограничување на зголеменото производство на сончева енергија што создава сè поголем притисок врз електричната мрежа на земјата. Меѓутоа, бидејќи банките веќе ги донесоа своите одлуки врз основа на различна регулаторна рамка, датумот на стапување во сила на 1 јануари „претставува значително кршење на принципите на добра волја и заштита на стекнатите права“.

Нацрт-законот за обновлива енергија сè уште веројатно ќе претрпи измени во парламентот пред да стане закон.