Намалување на минусот во буџетот, раст на платите, потрошувачката, извозот и инвестициите предвидува Министерството за финансии до 2028 година.
Владата на последната седница ја усвоила Фискалната стратегија за периодот од 2024 до 2028 година. Во неа, Министерството за финансии најавува „продолжување на фискалната консолидација, постепено намалување на буџетскиот дефицит и јавниот долг, како и поттикнување на економската активност преку капитални расходи и инфраструктури инвестиции и подобрување на условите за водење бизнис и отворање нови работни места“.
Во согласност со Фискалната стратегија, со исцрпување на негативните ефекти од последователните кризи, се очекува нормализација на глобалните движења, намалување на инфлациските притисоци и јакнење на економската активност кај нашите главни трговски партнери, што ќе придонесе кон зголемување на надворешната побарувачка и поповолен амбиент за инвестирање.
Според стратегијата, во следниот период буџетскиот долг етапно ќе се намалува и во 2028 година ќе стигне до 2,5 отсто. Намалувањето на дефицитот ќе се должи на зголемените инвестиции на државата во капитални проекти.
Министерството планира парите за капитални инвестиции во овој период да стигнат до пет отсто од БДП на годишно ниво, а задолжувањата што ги прави државата да се трошат за развојни проекти.
„Фокусот на фискалната политика останува на обезбедување значително ниво на јавни инвестиции, кои се предуслов за подобрување на економските перспективи, како и подобар живот на граѓаните. На среден рок се респектира златното правило во јавните финансии: капиталните расходи ќе бидат повисоки од буџетскиот дефицит, односно ќе се позајмува само за финансирање на инвестициските проекти. Реализацијата на буџетот ќе се раководи според принципот вредност за вложените пари (value for money), при што ќе се внимава парите на граѓаните да се искористат таму каде што даваат најголеми ефекти во остварување на целите за повисок квалитет на животот“, соопшти Министерството.
За следниот петгодишен период е планирано интензивирање на инфраструктурните проекти, односно инвестициски вложувања во патната и железничката инфраструктура, енергетската и комуналната инфраструктура, како и капитални инвестиции за подобрување на условите во здравствениот, образовниот и социјалниот систем, земјоделството, културата, спортот, заштитата на животната средина и правосудството.
„Реализацијата на капиталните расходи и инфраструктурните проекти во приоритетните области, во согласност со владините политики, се очекува да генерира позитивни мултипликативни ефекти врз економскиот раст на среден рок и да ја забрза реалната економска конвергенција кон европските економии“, се наведува во соопштението.
Во овој период даночната политика ќе биде насочена кон унапредување на ефикасноста и ефективноста во наплатата на приходите, зголемена даночна транспарентност, подобар квалитет на услугите и намалување на административниот товар.
„Со стратегијата се очекува зачувувањето на макроекономската стабилност и фискалната одржливост да создаде поповолни услови за динамизирање на економската активност и постигнување просечна стапка на раст од пет отсто во периодот 2024-2028 година. Приватната потрошувачка се очекува да оствари просечен годишен раст од 3,5 отсто, јавната потрошувачка просечно ќе расте за еден отсто, извозот се очекува да го одржи солидното ниво и има проектиран раст на 8,5 отсто, позитивните движења кај странските инвестиции исто така се очекува да продолжат, како и растот на просечната плата од 6 отсто“, се наведува во стратегијата.
Министерството за финансии ја изработува фискалната стратегија и ја доставува до Владата на Република Северна Македонија, имајќи ги предвид стратегиските приоритети на Владата на РС Македонија и предлозите на матичните буџетски корисници. Еден од најголемите приоритети на Владата е подобрување на управувањето со јавните финансии и зајакнување на среднорочното буџетирање за наредните пет години, што е дел и од процесот за пристапување на земјата во ЕУ.
.webp){kind=icon}
