АД ЕСМ понуди струја по цена од 53 евра за магават-час. Ова е единствената понуда што е доставена на тендерот за набавка на електрична енергија за задоволување на потребите на корисниците за периодот јули-декември 2023, соопшти „ЕВН хоме“.
Цената што ја понуди државната компанија е за 5,35 отсто пониска споредено со цената што се плаќа во моментов. Цената за периодот од јануари до јуни 2023 година изнесува 56 евра за мегават-час. Понудата на ЕСМ ќе обезбеди 100 отсто од вкупно планираните количества струја.
„За цената на електричната енергија на ’ЕВН хоме’ во наредниот период ќе одлучува Регулаторната комисија за енергетика, а таа ќе зависи од повеќе влезни параметри, како што се: цената по која АД ЕСМ му ја продава електричната енергија на ’ЕВН хоме’, цената на преносниот систем-оператор МЕПСО, цената на операторот на пазарот на електрична енергија МЕМО, како и цената на дистрибутивниот систем-оператор ’Електродистрибуција’“, соопшти ЕВН.
Цената што денеска ја понуди ЕСМ е клучна за формирањето на цената што граѓаните ќе ја плаќаат до Нова година. На новите сметки сепак ќе има зголемување затоа што данокот на додадена вредност од сегашните 10 се качува на 18 отсто.
Најавата за воведување евтина тарифа прекуден нема да се реализира. Поради проблеми со броилата, Регулаторната комисија за енергетика најави дека оваа поволност ќе важи од следната година.
Новата цена на струјата ќе биде соопштена следната недела, а ќе важи од први јули.
.webp){kind=icon}
