.webp){kind=icon}
Народната банка ги објави податоците од доменот на платежната статистика за првиот квартал од 2023 година кои покажуваат тренд на натамошна засилена употреба на дигиталните канали за извршување на плаќањата во земјата, особено од страна на граѓаните, како при употребата на платежните картички, така и при употребата на мобилните апликации за електронско иницирање на кредитните трансфери, или т.н. платни налози.
„Имено, во првиот квартал од 2023 година, годишниот раст на употребата на платежни картички издадени во земјата за готовински трансакции и за плаќање производи и услуги во земјата од страна на граѓаните изнесува 14,7 проценти кај бројот и солидни 12 проценти кај вредноста на овие трансакции. Притоа, значителен годишен раст од 16,8 проценти е забележан кај употребата на картичките за плаќање производи и услуги во земјата, при засилен раст на плаќањата на физичките места на продажба од 17,4 проценти, но и солиден раст од 11,1 проценти на плаќањата на виртуелните (интернет) продажни места“, информираат од Народната банка.
Оттаму додаваат дека годишен раст е забележан и кај плаќањата на граѓаните со платни налози, како кај бројот на платежните трансакции (6,1 проценти), така и кај вредноста на остварените трансакции (3,1 проценти), при натамошна зголемена употреба на електронското банкарство за иницирање на овие плаќања.
„Така, бројот на електронски иницираните платни налози во првиот квартал од 2023 година бележи раст од 14,5 проценти на годишна основа, што е двојно повеќе од годишниот раст во првиот квартал од 2022 година (7,1 проценти). Притоа, граѓаните особено ги користеле апликациите на мобилните телефони, со кои извршиле над една половина од вкупниот број електронски иницирани платни налози. За одбележување е дека бројот на платежните трансакции извршени преку мобилен телефон постојано расте и во првиот квартал од оваа година е поголем за 23,8 проценти од бројот на овие трансакции во истиот период од 2022 година. Истовремено, годишен раст, но не толку силен, од 3,5 проценти е забележан и кај употребата на компјутерите за извршување на плаќањата“, велат од Народната банка.
