Бектеши: Со ребаланс на буџетот и нови мерки за ранливите

Министерството за економија ќе донесе мерки што ќе бидат во корист на граѓаните, особено на категориите граѓани што имаат најголема потребa, изјави денеска министерот за економија Крешник Бектеши. Тој вели дека во моментов е при крај подготовката на предлог-ребалансот на буџетот и најверојатно до крајот на неделата, најдоцна почетокот на наредната недела, ќе бидат објавени и новите проекции и мерки. Минатата недела Филип Николовски, заменик-министерот за финансии, за „Блумберг Адрија“ изјави дека нема да се прави ребаланс на буџетот, туку ќе се направи само прераспределба на буџетските ставки.

Бектеши денеска тврди дека мерки ќе има и дека Министерството за економија на дневна база ги добива анализите од Државниот пазарен инспекторат (ДПИ), кои даваат инпут во креирањето и дизајнирањето на евентуалната помош. „Мерките се дизајнираат со Организацијата на потрошувачи, со стопанските комори и преку секторите на Министерството за финансии и Министерството за економија. ДПИ и директорот не ги креираат мерките, тие даваат инпут во делот на тоа каде би можело да се интервенира за одредени производи во одредени сектори“, рече Бектеши во одговор на прашање по посетата на  подружницата на „ЕВН Македонија“ во Бутел заедно со директорот на Бирото за метрологија, Абдуљ Сељам Селами. 

Крешник Бектеши во подружницата на ЕВН во Бутел/Министерство за економија

Тој нагласи дека сакаат директно да ги поддржат ранливите категории на граѓани, кои, како што кажа, поминаа тешка година со инфлацијата и додаде дека веднаш можат да реагираат и да ги ограничат маржите ако се одлучат на тоа. Тој ги повика производителите на леб во државата да не ја покачуваат цената, а за производителите на млечни производи истакна дека е надлежно Министерството за земјоделство, шумарство и водостопанство (МЗШВ).

Бектеши вели дека млечната индустрија не е во нивен домен, а дека во однос на лебот во неколку наврати ги повикал производителите на леб. „Разговарав со тие четири-пет компании од Скопскиот Регион што се поголеми да не ги менуваат цените. Тие многу добро знаат што ќе им следува ако имаа зголемување во цената на лебот“, прецизира Бектеши.  

Тој нагласи дека на веб-страницата на Министерството за финансии може да се види листата на прехранбени производи на кои евентуално би им се зголемило ДДВ од 5 на 10 отсто ако помине законското решение во Собранието. „Мислиме дека е коректна листа ,која е подготвена од страна на сите што беа вклучени. Сите проверки се направени со сите засегнати страни и тоа би било фер пристап за зачувување и заштита на најранливите категории на нашите граѓани“.

Бектеши истакна дека мислат оти треба да има солидарен данок, но додаде дека претходно треба да се направат некои измени во законското предлог-решение, имајќи предвид дека помина многу време од моментот кога беше пуштено во собраниска процедура.

Во моментов нема коментари за веста. Биди прв да коментира...

Остави коментар