Во првите единаесет месеци од 2023 година, извозот на стоки од Македонија е во вкупна вредност од 7,7 милијарди евра и забележа раст од 0,2 отсто во споредба со истиот период во 2022 година. Вредноста на увезената стока од јануари до крајот на ноември лани изнесува 10,2 милијарди, што е за 8,3 отсто помалку во споредба со претходната година, објави денеска Државниот завод за статистика.
Кога ќе го погледнеме периодот од јули до ноември во 2023 година, може да забележиме пад на извозот за 5,8 отсто откако порасна во првата половина на 2023 година, според аналитичарите на „Блумберг Адрија“.
„Причината за тоа е забавувањето на Европската Унија (ЕУ), која е главен извозен партнер на Македонија, но особено падот на извозот во Германија од 15,2 отсто од седмиот до единаесеттиот месец 2023 година“, вели Михаел Блажековиќ, аналитичар на пазари. „Увозот бележи пад, со оглед на тоа што за производство на извозни стоки се потребни увозни стоки“.
Економијата на Македонија е многу зависна од движењето на германската економија. Имено, дури 44 отсто од вкупниот годишен извоз оди во Германија. На ист начин, индустријата во земјава е високо концентрирана, така што 30 отсто од вкупниот извоз се хемиски и сродни производи, чиј извоз во периодот од јули до ноември од 2023 година падна за 18 отсто.
„Позитивна вест е што извозот од минус се претвори во нула во единаесеттиот месец од 2023 година поради растот на извозот на индустриска опрема и машини. Очекуваме дека извозот ќе се стабилизира, со оглед на тоа што најверојатно е избегната рецесијата во Германија, но не очекуваме значителен раст со оглед на големата зависност на економијата од Европската Унија, а економијата на Македонија треба да се преориентира кон други земји и различни индустрии заради диверзификација и зајакнување на отпорноста на економијата“, заклучува Блажековиќ.
.webp){kind=icon}
