Германскиот извоз неочекувано падна за прв пат по јануари

Германскиот извоз неочекувано се намали во јули, прекинувајќи ја серијата од пет последователни месеци на раст и намалувајќи ги надежите за брзо закрепнување на најголемата европска економија.

Испораките во странство паднаа за 0,8 отсто во споредба со претходниот месец, спротивно на прогнозите на економистите кои очекуваа нов пораст. Намалувањето се должи на падот на извозот кон земјите од Европската Унија, соопшти германскиот Завод за статистика во вторникот.

Bloomberg Mercury

Економските резултати на Германија во првата половина од годината беа подобри од очекувањата, при што извозот беше еден од главните двигатели на растот. Тоа ги поттикна економистите да ги зголемат своите прогнози за економски раст, а претседателот на Бундесбанк, Јоахим Нагел, изјави дека економијата би можела да порасне за 1отсто оваа година, што е двојно повеќе од проекцијата дадена пред само три месеци.

Според Михаел Херцум, економист во „Унион Инвестмент“, најновите трговски податоци сепак не се толку обесхрабрувачки.

„Извозните бројки често варираат од месец во месец“, наведе тој во анализа. „Повеќе значење има растот од 6,1 отсто во однос на истиот период минатата година. Тоа покажува дека германските извозници повторно земаат залет.“

Податоците на Дестатис покажуваат дека извозот кон САД во јули пораснал за повеќе од 19 отсто, додека увозот од најголемата светска економија се намалил.

Вкупниот увоз во Германија исто така опаднал, што доведе до зголемување на трговскиот суфицит на земјата на 21,3 милијарди евра (24,8 милијарди долари).