Железничкиот сообраќај на релација Скопје – Гевгелија утрово беше во прекин заради штрајкот на вработените на фабриката за шински возила „Колска“. Тие го блокираа сообраќајот затоа што УЈП шест месеци им ја блокира сметката, а Владата и Министерството за транспорт и врски не го решаваат статусот на оваа државна фирма веќе 20 години.
Колска три месеци не може да ги плаќа обврските и не може да набавува репроматеријали за работа заради блокадата на сметката од страна на УЈП. Во Колска во моментов за репарација чекаат 20 товарни и еден патнички вагон, но таа не може да почне заради недостиг на репроматеријали. Најавено е дека треба да пристигнат уште 10 цитерни од фирмата „Оилко”.
„Освен итно деблокирање на сметката од страна на УЈП, ние од надлежните, Владата и министерството бараме конечно решавање на статусот на фирмата со што ќе запре нашата агонија. Ние веќе 20 години и сега како најприфатливо решение за вработените од „Колска“, бараме таа да биде во состав на ЈП Македонски железници затоа што основната дејност на нашата фабрика е репарација на железнички вагони,како што бевме порано“, потенцира претседателот на синдикатот, Тони Арсовски.
Тој информира дека овие барања пред еден месец ги испратиле до премиерот Димитар Ковачевски. Тогаш во разговор со вицепремиерот Фатмир Бетиќи им било ветувано дека некој ќе ја купи фабриката, но сето тоа пропаднало.
„Пред еден месец ни прати порака и дека ќе ги посети работниците но засега ништо од тоа ветување“, вели синдикалецот и најавува дека блокадата на железничкиот сообраќај ќе продолжи и утре.
Од некогашните 300 вработени пред 20 години, поради пензионирање и непримање на нови работници сега се останати 76, а за две години сегашниот број на работници ќе се преполови.
Вработени веќе 4 месеци примаат под минимална плата.
.webp){kind=icon}
