Невработените и претставниците на компаниите се сретнаа очи в очи на Саемот за вработување, кој го организира Стопанската комора на Македонија. Целта на организаторите е преку непосреден контакт едните да најдат работа во земјава, другите да ги пополнат празните работни места во своите компании.
На саемот се претставија 25 компании и околу 130 невработени лица. Триесетина од невработените веќе в петок ќе одат на второ интервју во компаниите и се многу поблиску до вработување.
|
Според Наташа Јаневски од Стопанската комора на Македонија, и двете страни се задоволни затоа што директниот контакт овозможува да се добијат неопходните информации за работното место, потребните квалификации и висината на платата. Таа вели дека, вообичаено, невработените кога ги читаат огласите за работа мислат дека не се квалификувани и не аплицираат, а ваквиот директен пристап ги охрабрува почесто да се јавуваат на огласите. |
Какви невработени има во земјава?
Според податоците на Агенцијата за вработување, заклучно со 31 октомври во Македонија има 97.879 невработени лица, но најголем дел од нив се повозрасни, на возраст од 55 до 59 години, и не се многу барани на пазарот на трудот поради тоа што не им треба уште многу време до пензија.
Според огласите за работа, најмногу се бараат лица со средно образование. Податоците на Агенцијата покажуваат и дека најголем дел од невработените, дури две третини, се токму такви.
Лоша понуда на невработени
Невработени има, но понудата е слаба, сметаат аналитичарите на „Блумберг Адрија“, но тоа не е случај само во Македонија. Слабата понуда на работна сила и на ниво на ЕУ е висока и изнесува 12 отсто.
„Лошата“ понуда за работа вклучува невработени, луѓе што работат со скратено работно време, луѓе што бараат работа но сè уште не се достапни за да започнат со работа и луѓе што се веднаш достапни за работа но не сакаат да работат во моментов.
Во регионот Адрија лошата понуда на работна сила изнесува во просек 14,8 отсто од вкупната работна сила, што е над просекот на ЕУ.
„Овде водат земјите што не се членки на ЕУ, Македонија со 24 отсто, БиХ со околу 18 отсто и Србија со околу 16 отсто од потенцијалот за вработување. Во овие земји работната сила не се користи оптимално и се губи продуктивноста на економијата. Но, од друга страна, постои силен базен за натамошно привлекување инвестиции, што на среден рок треба да ја приближи ситуацијата до слични нивоа на просекот на ЕУ“, се наведува во анализата на „Блумберг Адрија“.
.webp){kind=icon}
Во моментов нема коментари за веста. Биди прв да коментира...