Новогодишната кошничка ќе опфаќа повеќе од 675 производи и ќе трае од 15 декември до 15 јануари. Со неа се очекува намалување на цените на производите за 10 и повеќе проценти. Листата на производите што се понудени од страна на производителите и дистрибутерите може да се види на веб-страницата mojakosnica.mk.
Листата на производи, како што кажа денеска премиерот Христијан Мицкоски, е договорена заедно со стопанските комори, синдикатите, производителите, дистрибутерите и трговците.
„Направивме нешто што можеби досега никогаш не е направено - сите заедно разговаравме извесен период и за време на тие разговори дојдовме до компромис. Сите се согласивме во периодот од 15 декември до 15 јануари цените на повеќе од 600 артикли да бидат намалени и брендирани со етикети на кои ќе пишува ’Помалку трошоци, повеќе за тебе, се грижиме’“, рече Мицкоски на денешната прес-конференција.
Тој нагласи дека не станува збор за интервентна мерка на Владата и за ограничување на цените, туку за консензуално решение, поради што нема да има казнување, туку ќе има мониторинг дали на тие производи ќе бидат залепени етикетите за да бидат прегледни за граѓаните.
„Очекувам и понатаму да продолжиме заеднички да бидеме општествено одговорни во овие тешки моменти, заеднички да работиме даим помогнеме на македонските граѓани, на македонската економија, стандардот на македонските граѓани и на тој начин да има повеќе за секого. Очекувам успешна акција, очекувам ниски цени спроти новогодишните празници и очекувам среќни граѓани и полна трпеза за време на празниците што следуваат“, порача Мицкоски.
На забелешките од новинарите дека во листата на производи во новогодишната кошничка има производи чии цени во изминатиов период се зголемени, премиерот Мицкоски му предочи на директорот на Пазарниот инспекторат да направи контрола какви се цените на пазарот сега и потоа дали тие ќе бидат намалени.
„Не би сакал да верувам дека сите оние што денеска беа присутни тука, беа присутни колку да бидат присутни, а потоа да го изиграат договореното. По 15 јануари и понатаму ќе продолжиме на добра волја и преку разговор да работиме за периодот што следува, бидејќи стандардот на граѓаните ни е пред сè и над сè. Секогаш ја имаме на располагање алатката Владата да донесе одлука, но не сакаме да работиме на тој начин, бидејќи во минатото беше критикувано од страна на трговците, производителите дека се репресивни мерки. Сакавме да покажеме дека заеднички можеме да дојдеме до производ околу чија цена сите ќе се согласиме и покажавме дека тоа е можно“, рече Мицкоски.
.webp){kind=icon}
