Намалување на цените на горивата: Дизелот поевтинува за осум денари, бензините за четири

Возачите од полноќ ќе плаќаат пониски цени за горивата. Регулаторната комисија за енергетика (РКЕ) донесе нова одлука со која малопродажните цени на нафтените деривати во просек се намалуваат за 5,81 отсто.

Најголемо е намалувањето кај дизелот, кој поевтинува за осум денари за литар и од 00:01 часот на 11 август ќе се продава по 91,50 денари. Цените на двата бензина се намалуваат за по четири денари, па еуросупер БС-95 ќе чини 87 денари за литар, а еуросупер БС-98 ќе се продава по 89 денари.

Поевтинува и екстра-лесното масло за домаќинство (ЕЛ-1), и тоа за шест денари за литар, со што новата цена изнесува 92,50 денари. Цената на мазутот М-1 НС се намалува за 2,881 денара за килограм и ќе изнесува 43,538 денари.

Новото поевтинување следува по падот на референтните цени на нафтените деривати на светскиот пазар во периодот меѓу двете пресметки на РКЕ. Кај бензините тие се намалиле во просек за 6,186 отсто, кај дизелот за 10,435 отсто, кај екстра-лесното масло за 8,138 отсто, а кај мазутот за 7,151 отсто.

Во пресметката влијаело и движењето на девизниот курс. Курсот на денарот во однос на доларот е понизок за 1,0313 отсто во споредба со претходната пресметка.

Од РКЕ посочуваат дека утврдените цени се максимални. Тоа значи дека трговците на големо и мало можат горивата да ги продаваат и по цени пониски од утврдените.

Новите цени од 11 август:

еуросупер БС-95 - 87 денари за литар
еуросупер БС-98 - 89 денари за литар
еуродизел БС (Д-Е V) - 91,50 денари за литар
екстра-лесно масло 1 (ЕЛ-1) - 92,50 денари за литар
мазут М-1 НС - 43,538 денари за килограм