text size
Дизелот од полноќ ќе ја надмине границата од 100 денари и ќе се продава по максимална цена од 101,5 денари за литар, откако Регулаторната комисија за енергетика (РКЕ) донесе нова одлука за цените на нафтените деривати.
Од 00:01 часот на 25 август, Еуродизел БС (Д-Е V) поскапува за 3,5 денари за литар, од досегашните 98 на 101,5 денари. Бензините поскапуваат за 1,5 денар за литар, па Еуросупер БС-95 ќе чини 93 денари, а Еуросупер БС-98 - 95 денари за литар.
Екстра лесното масло за домаќинство (ЕЛ-1) поскапува за два денара и ќе чини 100,5 денари за литар. Цената на мазутот М-1 НС се зголемува за 1,850 денари, на 45,576 денари за килограм.
Со новата одлука, малопродажните цени на нафтените деривати во просек се зголемуваат за 2,62 отсто во однос на цените утврдени со одлуката од 17 август.
Поскапувањето следува по растот на цените на нафтените деривати на светскиот пазар. Во однос на претходната пресметка, цените на бензините се зголемиле во просек за 3,795 отсто, на дизелот за 4,842 отсто, на екстра лесното масло за 3,958 отсто, а на мазутот за 6,467 отсто.
Курсот на денарот во однос на доларот во периодот опфатен со новата пресметка бил понизок за 0,5340 отсто.
Ова е второ значително поскапување на дизелот за една недела. Со одлуката од 17 август, која се применува од 18 август, Еуродизел поскапе за 6,5 денари, од 91,5 на 98 денари за литар. Со новото зголемување од 3,5 денари, дизелот за една недела поскапува вкупно за 10 денари за литар.
Новата цена од 101,5 денари за литар, сепак, не е историски највисока цена на дизелот во Македонија. Во текот на енергетската криза во 2022 година дизелот достигнуваше и повисоки цени.
Од РКЕ нагласуваат дека станува збор за максимални малопродажни цени. Трговците на големо и мало можат да ги продаваат нафтените деривати и по цени пониски од утврдените максимални износи.
.webp){kind=icon}
