.webp){kind=icon}
За 17,3 проценти се намалиле договорените градежни работи во странство во првата половина годинава, споредено со истиот период лани. Податоците што ги објави Државниот завод за статистика покажуваат дека во првите шест месеци годинава биле договорени проекти во вкупна вредност од 2,1 милиони евра, што е за 450.000 евра помалку од истиот период лани.
Пазарите во Србија и Босна и Херцеговина се целосно надвор од игра. Лидер е германскиот пазар но, тој бележи пад од 7,6 проценти. Во негатива од 11,7 проценти се и договорените работи во Црна Гора.
Раст бележи единствено бугарскиот пазар, каде договорените работи во периодот јануари-јуни се речиси удвоени споредено со лани. Но, се работи за градежните работи со помала вредност во однос на договорените проекти во другите земји. Така, во Германија се договорени градежни работи во вредност од речиси 1,79 милиони евра, додека во Црна Гора договорената вредност е 171.000 евра, а во Бугарија проектите се вредни околу 150.000 евра.
Во наведениот период, градежната оператива од Македонија во странство извршила градежни работи во вкупна вредност од 1,09 милиони евра, што е за 16.9 отсто помалку во споредба со истиот период од претходната година.
