Владата одобри 250 милиони евра од унгарскиот кредит за бизнис секторот

Владата денеска ги одобри договорите за користење на средствата од унгарската кредитна линија наменети за компаниите со што практично сега Развојната банка може да ги потпише договорите со банките и средствата да станат оперативни. Парите ќе се земаат од комерцијалните банки со рок на отплата до 15 години од потпишувањето на договорот и грејс период од три години. Каматната стапка е 1,95 проценти, без дополнителни надоместоци. Максималниот износ за кој може да се аплицира е до 10 милиони евра, а во целиот проект вклучени се сите 13 банки. 

Според Владата, ова е најголема сума што му е дадена на располагање на бизнис секторот под супер поволни услови, а крајниот бенефит ќе го имаат компаниите и граѓаните со зголемување на конкурентноста на компаните и отворање на нови работни места.

                      

Унгарскиот кредит кој ќе биде наменет за компаниите ќе има мало влијание врз економската активноста на земјата вели во емисијата „Спотлајт“, економскиот аналитичар Абил Бауш. Сепак за поголем раст на економијата со овие 250 милиони евра требаше да се размисува да се таргетираат одредени сектори кои ќе имаат додена вредност во економијата, како земјоделството и енергетскиор сектор вели Бауш.

  

Министерката за финансии Гордана Димитриеска-Кочоска денеска на прес-конференција рече дека постапката ќе биде транспарентна и критериумите ќе бидат еднакви за сите. 

„Трошоците за одобрување се нула денари. Постапката ќе биде максимално транспаретна и условите ќе бидат еднакви за сите компании. Со денешните одлуки од страна на Владата влегуваме во последната фаза од операционализацијата на средствата од унгарскиот заем наменети за компаниите. Со потпишување на договорите се отвара патот за Развојна банка да ги добие средствата од Буџетот, а понатаму да бидат пренесени во комерцијалните банки и оттаму до компаниите“, рече министерката за финансии.

Ризикот за одобрување на средствата, како што посочи, е кај банките кои одлучуваат кој и какви проекти ќе кредитираат. 

Приоритет, како што рече Димитриеска-Кочоска, ќе имаат производствените компании, но можност да аплицираат ќе имаат сите компании.

„Секако акцент имаат производствените компании, но ако ги погледнете анализите на Народната банка, ќе видите дека генерално пласманите што ги прават банките годишно не се нешто многу поголеми од овој износ и затоа ние на крајот се одлучивме да се отвориме кон сите компании во насока на тоа секој да има пристап. Секако производните капацитети ќе имаат приоритет и по информациите што ги имам од најголемите банки во државата, тие веќе имаат постоечки и одобрени пласмани за кои само чекаат потпишување на соодветната документација“, рече Димитриеска-Кочоска.

Премиерот Христијан Мицкоски вети дека нема да има тргување на влијание што се отвори како сомнеж откако се прошири опфатот на компании кои може да аплциираат за добивање на средствата. Интенцијата за проширување на опфатот, како што посочи, била да се искористат средствата, а одлуката е донесена врз основа на анализите и бројките кои покажуваат дека стопанството годишно може да повлече 250 милиони евра. 

Средствата од унгарската кредитна линија се дел од заемот што Владата го зема од Унгарија за што договорот беше потпишан на 8 октомври во Будимпешта.

Во моментов нема коментари за веста. Биди прв да коментира...

Остави коментар