Владата воведува новини во плаќањето патарини во Македонија

Се менуваат начините на плаќање патарини по електронски пат. Владата неодамна донесе одлука што, како што тврдат оттаму, ќе го забрза протокот во сообраќајот и ќе го зголеми бројот на корисници што ќе ги плаќаат патарините електронски.

Целта е, како што велат од Владата за „Блумберг Адрија“, да се скрати времето на чекање, да се зголеми ефикасноста на наплатните станици, да се зголеми безбедноста во сообраќајот, но и да се намалат злоупотребите преку „намалување на влијанието на човечкиот фактор и зголемување на задоволството на корисниците, односно граѓаните“.

Нови цени за дополнување

Со новата владина одлука се менуваат износите за дополнување на бесконтактните смарт-картички и електронските уреди за наплата (МТАГ).

Минималниот износ за дополнување на смарт-картичката отсега ќе изнесува 500 денари. Досега купувањето на картичката чинеше 100 денари, а секое следно дополнување не смееше да биде под 300 денари.

Уредите за електронска наплата при купување поевтинуваат од 1.200 на 1.000 денари, но се зголемува најниската сума за секое следно дополнување. Наместо досегашните 300 денари, секое следно дополнување нема да може да биде поевтино од 1.000 денари.

Корисниците на електронскиот систем за наплата на патарините ќе користат и попуст. За плаќање со смарт-картичка попустот за секое наредно дополнување ќе изнесува „два отсто на дополнетиот износ на патарина, кој се пресметува при секое поминување на наплатна станица, а корисниците на МТАГ добиваат попуст од три отсто на дополнетиот износ на патарина, кој се пресметува при секое поминување на наплатна станица“, велат од Владата.

Се менува и рокот за плаќање на казната односно издадениот билет за ненаплатена патарина. Наместо за 24 часа, ќе може да се плати во рок од два дена.

Уредите МТАГ отсега ќе може да се купат и дополнат на повеќе продажни места низ земјата, преку надворешни дистрибутери.

Третина од наплатата е по електронски пат

Заклучно со декември лани, учеството на електронската наплата на патарини изнесува околу 33 отсто. Од почетокот на ваквиот начин на плаќање во јули 2019 година до декември лани биле продадени 242.080 електронски уреди, од кои 203.828 се смарт-картички и 38.252 МТАГ-уреди. За тој период се направени вкупно и 1.842.224 поединечни дополнувања на електронските уреди на различни суми, а вкупната сума за дополнувања досега изнесува 3.509.815.300 денари (57 милиони евра).

Од средината на 2023 година возачите од Србија патарина за македонските патишта плаќаат со српскиот таг. Според податоците на јавното претпријатија „Путеви Србије“, во македонската база има 71.796 корисници од Србија што се поврзани со македонскиот систем. Вкупниот промет изнесува 66,765.010 денари или нешто над милион евра.

И македонскиот таг важи на српските патишта исто така од јуни 2023 година и за овој период 3.124 македонски возачи се активни во српската база. До 8 април годинава тие во Србија платите над 754 илјади евра патарина, објави српската редакција на „Блумберг Адрија“.

Од 2020 година наплатата на патарините се зголемила двојно

Минатата година низ македонските патарини поминале 62.662.988 возила и над 99 отсто од нив ја платиле давачката. Собрани биле 66,5 милиони евра. Според годишниот план на Јавното претпријатие за државни патишта (ЈПДП), до крајот на оваа година очекувањата се дека ќе бидат собрани над 73 милиони евра само од патарини. Тоа значи дека ЈПДП планира годинава да собере седум милиони евра повеќе од лани, а дури 40 милиони евра повеќе од 2020 година.

Вкупните приходи на ЈПДП за годинава се проектирани на 13 милијарди денари или 211,4 милиони евра, а патарините не се најголемиот извор на приходи. Во текот на 2025 година претпријатието планира да собере најмногу од наплата на дел од акцизата од нафтените деривати – 97 милиони евра.

Во пишувањето на текстот помогна Бојана Лазаревиќ.

Во моментов нема коментари за веста. Биди прв да коментира...

Остави коментар