Од шупливо во празно за враќање на кредитот за неизградениот автопат Кичево-Охрид

Во јули Јавното претпријатие за државни патишта (ЈПДП) немало пари да ја плати достасаната рата од кредитот кон кинеската „Експорт-импорт банка“ за изградбата на автопатот Кичево-Охрид. Ратата ја платило Министерството за финансии затоа што е гарант на долговите на ЈПДП и затоа што била активирана државната гаранција.

ЈПДП ќе му ги врати парите на Министерството, но не веднаш, туку на 120 рати (10 години), без камата и со грејс период од пет години. Или ЈПДП ќе почне да се раздолжува со гарантот од 1 јули 2029 година. Тоа е потврдено и на владина седница минатата недела.

„Блумберг Адрија“ вчера се обрати во финансиската служба во Јавното претпријатие. Оттаму ни рекоа дека годишно треба да плаќаат по две рати кон кинеската банка. Во јули ратата ја платило Министерството затоа што компанијата немала пари. Тие ни објаснија дека не често, но се случува ЈПДП да нема пари да ги намирува ратите, особено за овој кредит поради висината на ануитетите.

Потоа, како што ни кажаа, сумата што ја платило Министерството се дели на рати и ЈПДП се раздолжува. „Да можело претпријатието да ја плати веднаш, немало да треба да се активира државната гаранција“, едноставно ни објаснија од ЈПДП.

Колку ѝ должи ЈПДП на државата?

На прашањето колкава е ратата што државата ја платила во име на ЈПДП ни рекоа дека сè уште немаат прецизна информација и дека и тие ја очекуваат затоа што им треба за завршната сметка за 2024 година.

Извештајот на независниот ревизор на финансискиот извештај за 2023 година, пак, покажува дека Јавното претпријатие заклучно со 31.12.2023 година имало обврски кон Министерството за финансии во висина од над 103 милиони евра.

Дел од овие обврски веќе е отплаќа на рати од 2022 и 2023 година. Од 1 октомври годинава ќе почне плаќање на уште еден долг од над 8,8 милиони евра, кој претпријатието ќе го регулира на 120 рати. Во 2026 и  2028 година ќе почне отплатата на уште два кредита кон државата, едниот во висина од 18 другиот од 17,4 милиони евра. И двата ЈПДП ќе ги плаќа месечно, во период од 10 години.

Долгот на ЈПДП кон Министерството за финансии за една година се зголемил за околу 26 милиони евра, а неможноста за плаќање на обврските и активирањето државни гаранции го забележува и Државниот завод за ревизија во извештајот на 2022 година.

ЈПДП работи со добивка

ЈПДП трупа долгови кон државата иако работи со добивка. Според финансискиот извештај за истата 2023 година, таа година претпријатието остварило приходи од работењето во износ од близу 11 милијарди денари. Трошоците биле двојно пониски. Оперативната добивка во 2023 година изнесувала 5.655.904.003 денари или близу 92 милиони евра, што е за три отсто повеќе од 2022 година и исто толку над планот за 2023 година.

Позитивниот тренд продолжил и во 2024 година. Според финансискиот извештај за првиот квартал лани објавен на веб-страницата на ЈПДП, во периодот јануари-март биле остварени 3,8 милиони евра повеќе приходи од истиот период во 2023 година. Раст е забележан во сите сегменти. Најмногу пари претпријатието инкасирало од дел од акцизата за нафтени деривати, а следната ставка што го полни буџетот се патарините.

Во моментов нема коментари за веста. Биди прв да коментира...

Остави коментар