Колку чини еден пат во Македонија: Нов долг од Светската банка

Германската компанија „Кромберг и Шуберт“ се закани дека ќе го блокира патот што води до граничниот премин Меџитлија со Грција. Причина за револтот е што тој долго време се реконструира и е необележан, нема сигнализација, што значи дека е опасен. На тој патен правец често има и несреќи, а неодамна работник на фабриката го загуби животот.

Германскиот инвеститор понуди и помош за државата побрзо да го заврши проектот, кој го користат над 5.200 нивни вработени од Битола, Прилеп, Ресен, Демир Хисар и од околните села.

„За превоз на дел од вработените, во текот на едно деноноќие на патот сообраќаат над 150 возила за групен превоз (над 70 автобуси и 80 комбиња) бидејќи фабриката работи во три смени. Некои од вработените се превезуваат со автомобили и во текот на едно деноноќие на патот во двата правца сообраќаат околу 270 автомобили. Во просек, по околу 10 транспортни камиони исто така дневно во двата правца го поминуваат патот за транспорт на репроматеријали и производи до и од нашата фабрика“, се наведува во дописот на компанијата „Кромберг и Шуберт“.

Оваа делница долга 12,5 километри е дел од државниот пат А3. Изградбата е во завршна фаза односно во тек е асфалтирање, по што ќе бидат поставени банкините, па ќе биде поставена  и сигнализацијата.

Владата ќе се задолжи за пат кој требаше да биде готов пред две години 

Германските инвеститори во Битола се први што јавно реагираат на бавната изградба на патиштата. А делницата што води до Меџитлија не е единствената што го отежнува функционирањето и на граѓаните и на стопанството.

Во буџетот со години се проектираат големи суми за капитални инвестиции, но потоа со ребалансите се кратат, а и без кратење реализацијата е слаба.

Меѓу „вечните“ проекти за изградба на патишта е и експресниот пат од Градско до Прилеп и Битола. Тој се провлекува низ државните буџети веќе осум години, а требаше да биде завршен во 2019 година.

И изградбата на патот што треба да ја поврзе земјава со Бугарија има слична приказна. Делницата Ранковце – Крива Паланка почна да се гради во мај 2018. На веб-страницата на Јавното претпријатие за државни патишта (ЈПДП) е наведено дека рок за завршување е мај 2021 година. Исто така е наведено дека ќе се финансира со заем од Светската банка и дека станува збор за пат со должина од 23 километри и вредност од околу 60 милиони евра.

Но, во август годинава, две години по истекот на рокот за завршување, Владата на седница расправаше по „информација за потребата од обезбедување дополнителни средства во вид на заем од Светската банка за затворање на финансиската структура на проектот за надградба и развој на патиштата“.

„Блумберг Адрија“ побара одговор од Министерството за финансии и ЈПДП за што ќе се бара заем од Светската банка.

Од јавното претпријатие добивме одговор дека станува збор за заем од 31 милион евра за проектот за подобрување и развој на патишта, кој се финансира со заем од Светската банка. „Заемот е наменет за изградба на експресниот пат Ранковце - Крива Паланка“, ни одговорија од ЈПДП.

Од Министерството за финансии, пак, велат дека Владата донела заклучок врз основа на кој ќе бидат завршени сите процедури утврдени со Законот за јавен долг и „наскоро ќе биде испратено официјално барање до Светската банка“. 

Инаку, банката за овој проект еднаш веќе даде оцена „умерено незадоволително“. Тоа беше во 2019 година. Тогаш проценија дека во текот на летните месеци треба да се забрза изградбата на патот. Сега, на крајот на летото, Владата одлучува да бара дополнителни средства. Новиот рок за завршување е следното лето.

МИА

Растат трошоците за кредитите, патиштата не се готови

Рекордер по времетраењето на изградбата е автопатот Кичево - Охрид, кој се гради веќе десет години и чини по 10 милиони евра за секој километар (57 километри). Последниот рок за завршување на овој автопат, кој води до најголемиот туристички центар во земјава, до охридскиот аеродром, до повеќето странски фабрики во овој регион, е крајот на оваа година.

Сепак, државните ревизори во својот последен извештај напишаа дека тоа не е остварливо.

„Отсуството на контрола и надзор во фазата на проектирање, отсуството на тендерска постапка за утврдување на цените за градбата, некоординираното дејствување на институциите во постапката за одобрување инфраструктурни проекти и постапките за експропријација, комплексната правна рамка за измени во текот на градба, непостоењето на мониторинг и надзор на имплементацијата на проектот имаа за ефект пролонгирање на рокот за завршување на проектот од првичниот рок, 4.5.2018 година. Рокот крајно е ревидиран со 31.12.2023 година, со голема неизвесност за остварување на овој рок и дополнителни трошоци што ќе се создадат до завршувањето на проектот“, се наведува во ревизорскиот извештај.

Од ДЗР информираат дека за овој автопат се прогнозирани дополнителни и непредвидени работи во износ од 312 милиони евра, а само вредноста на тунелот Пресека е зголемена за 254 проценти, на 111 милиони евра.

Растат трошоците и за другите почнати а недовршени инфраструктурни проекти во земјава.

Според Заводот, бавната динамика на реализација на проектите се должи на слабости во техничките решенија како дел од проектната документација, раскинување на договори со изведувачи од различни причини, поведување постапка за меѓународна арбитража, административни пречки за започнување на експропријацијата, комплексна правна рамка со повеќе вклучени институции за утврдување на надоместокот за експропријација што го блокира ефикасното решавање на експропријација.

 

Во моментов нема коментари за веста. Биди прв да коментира...

Остави коментар