Каков ќе биде ефектот од „Бехтел и Енка“ – развој или крах?

Ефектот од работата на „Бехтел и Енка“ на коридорите 8 и 10 може да донесе две крајности - едната е развој на македонското градежништво, другата е негов крах, вели во разговор за „Блумберг Адрија ТВ“ Андреа Серафимовски, претседател на Здружението на градежништвото, индустријата на градежни материјали и неметалите.

Според него, ќе се случи крах ако „на проектите не бидат ангажирани домашните компании во капацитетите што ги имаат, во обемот во кој може да ги сработат работите и под услови што ги има главниот изведувач.                   

„На сето ова влијание имаат и условите под кои работи ’Бехтел и Енка‘, а кои се многу поповолни во поглед на избегнување на административните и правните бариери со кои градежниот сектор се соочува во последните десетина години и затоа има проекти што траат повеќе од десет години“, објаснува Серафимовски. Од друга страна, Серафимовски вели дека ако домашните компании бидат соодветно ангажирани, градежништвото би можело да доживее развој.

  

Колкаво е учеството на локалните фирми во работите на „Бехтел и Енка“?

Според информациите од американскиот конзорциум „Бехтел и Енка“, учеството на локалните компании во нивните активности постојано расте. Деновиве претставниците на компанијата имаа состаноци со регионалните комори во Прилеп и во Битола, пред кои ја презентираа платформата за соработка.

„Овие состаноци имаат цел подобро да ги објаснат водечките принципи на тендерскиот процес на ’Бехтел и Енка’ за зајакнување на учеството на локалните компании во проектот за изградба на автопатишта, што до денес, според информациите на ’Бехтел и Енка’, кулминира со приближно 90 отсто домашни компании од подизведувачите и со 65 отсто од доставувачите“, соопштија од Стопанската комора на Македонија.

„Бехтел и Енка“ во земјава ќе работи на изградба на 111 километри патна мрежа, на што преку тендери ќе бидат ангажирани компании за стоки и за услуги.

„Конзорциумот ’Бехтел и Енка’ преку оваа и преку големиот број средби со претставници на Стопанската комора ја потврдува својата намера да работи партнерски со домашните компании, но и да даде поддршка и појаснување во процесите на учество и на соработка“, се наведува во соопштението од Комората.

Експропријацијата ќе заврши до јануари 2025 година

Според американскиот конзорциум, во наредниот период, кога ќе заврши поголем дел од експропријацијата, ќе има и повеќе можности за работа за македонските компании, со што ќе се овозможи поттик за локалната економија.

Министерот за транспорт и врски Александар Николоски, пак, минатата недела изјави дека во однос на експропријацијата е направен голем прогрес.

„До јануари следната година ќе заврши целокупната експропријација. Само за споредба, откако беше потпишан договорот, па до мојот избор на министер, а тоа е период од две години, експропријацијата беше со прогрес од 25 отсто. За овие шест месеци ќе се завршат овие 75 отсто, што многу зборува за посветеноста“, рече тој.

Во моментов нема коментари за веста. Биди прв да коментира...

Остави коментар