Паралелно проектирање и градење на патиштата е лекот за болната македонска патна инфраструктура. Министерот за транспорт и врски Благој Бочварски најавува дека со менување на моделот на градба ќе се надмине сегашната практика автопатиштата да се градат подолго од деценија. „Бехтел и Енка“ ќе применува токму таков модел при изградбата на патиштата по должината на коридорите 8 и 10д.
Моделот што сега се применува бара проектот да биде целосно готов за да може да се гради. Според Бочварски, токму тоа е причината за бавната реализација на градбите.
„Тој модел не ги дава посакуваните резултати и ги пролонгира финалните рокови“, истакна министерот за транспорт и врски Благој Бочварски, кој се обрати на вториот ден од Првата конференција за патна инфраструктура, која се одржува во Охрид.
Бочварски, како што соопштија од Министерството за транспорт и врски, ги истакна придобивките од воведувањето на новиот концепт на изградба на инфраструктурата на коридорите 8 и 10д и нагласи дека потребата од нов модел е одговор за развој на градежниот сектор, инфраструктурата и севкупно економскиот развој на државата.
„Со новиот концепт за изградба воведуваме паралелно проектирање и градење, каде што заштедуваме доста време, наместо како што беше претходно, за да дојдеме до изградба, мораше да имаме проектирано 100 проценти од трасата. Наша цел е забрзување на изградбата на капиталните проекти, но тоа не значи дека нема да бидат квалитетни, туку напротив, контролните механизми на државата остануваат, тука најмногу се концентрираме на кратење на административните пречки. Ги забрзуваме процедурите, тоа е најважно, зашто видовме како се одвива досега реализацијата на огромните капитални проекти. Убеден сум дека новиот концепт ќе го даде резултатот, проектите ќе се градат побрзо и граѓаните нема да ги трпат нервозите од задоцнување на изградбата. Овој модел ќе важи за сите државни патишта од национален интерес, не само за автопатиштата што ќе ги градат ’Бехтел и Енка’, исто така и за изградба на железници, гасоводи. Ова е нешто кое државата го става на посебна лента од другите помали проекти“, изјави министерот за транспорт и врски Благој Бочварски.
МИА
Директорот на ЈП за државни патишта Рустеми се осврна на предизвиците со кои се соочува јавното претпријатие при изградбата на патната инфраструктура во државата, истакнувајќи дека сега е моментот да се смени концептот на изградба за да може патиштата да се градат побрзо и поефикасно.
„Ако не се реализира навремено одреден проект, ние како ЈП за државни патишта, Министерство за транспорт и врски и Владата имаме дополнителни финансиски импликации. Тоа не можевме веќе да го дозволиме и моравме да го решиме. За таа цел одлучивме да пристапиме кон овој нов концепт за изградба на инфраструктурата и сметам дека го направивме вистинскиот чекор. Само за споредба, според статистиката, досега сме граделе 5,8 километри автопат годишно, а новиот концепт ни дава можност да градиме над 20 километри автопатишта годишно“, изјави директорот на јавното претпријатие за државни патишта Ејуп Рустеми.
.webp){kind=icon}
